Masuso positibo sa COVID-19

CEBU, Philippines — Usa ka buwan nga masuso ang apil sa bag-ong positibo sa coronavirus disease (Covid-19) sa Lalawigan sa Sugbo.

Ang maong bata gikan sa Lungsod sa Argao ug gi-test kini human nakasinati og ubo ug hilanat.

Apil ang maong masuso sa walo ka bag-ong kaso sa Covid-19 sa Probinsiya sa Sugbo.

Si Gob. Gwendolyn Garcia nagkanayon nga sukad niadtong Mayo 18 hangtud Mayo 21, moabot sa 1,104 ang na test lukop Sugbo diin 888 ang negatibo ug 216 ang positibo.

Sa mga positibo, 11 niini ang gikan sa Probinsya sa Sugbo diin tulo ang repeat test ug walo ang bag-ong kaso.

Gawas sa usa ka buwan nga masuso, duha sab ang bag-ong kaso sa Dakbayan sa Talisay diin ang usa 32-anyos nga lalaki nga taga Ilang-Ilang, San Isidro ug adunay tuberculosis (TB) samtang ang usa bag-ong nanganak nga inahan.

Security guard

Ang laing positibo sa Probinsiya sa Sugbo usa ka security guard nga taga Badian apan nagtrabaho sa Dakbayan sa Sugbo.

Ang usa kadtong nadisgrasya nga taga Carmen nga adunay sakit sa kasing-kasing samtang ang tulo jail guard sa Cebu Provincial Detention and Rehabilitation Center (CPDRC).

Samtang nadugangan na sab ang kaso sa Covid-19 sa Siyudad sa Sugbo base sa datos sa Cebu City Health Department nga gipagawas ni Atty. Rey Gealon, tigpamaba ni Mayor Edgardo Labella.

Sa 32 ka bag-ong kaso duha niini gikan sa Cebu City Jail samtang tag-usa ka kaso sa Barangay Capitol Site, Mambaling, Sawang Calero, Suba, Ermita, San Nicolas ug Bulacao.

Sa kinatibuk-an ang Siyudad sa Sugbo aduna nay 1,814 ka kaso sa Covid-19 apan ang recoveries niabot na og 114.

Kadaghanan sa kaso sa Covid-19 sa siyudad mga asymptomatic o wala’y mga sintomas kinsa gibalhin na sa mga Barangay Isolation Centers aron maatiman sa mga tinugyanan sa CCHD.

Hangyo

Si Labella nagsige og balik-balik og hangyo sa katawhan nga magpabilin sa panimalay ug dili mogawas kun wala’y importanteng tuyo ug mosunod sa mga lagda nga gipagawas sa kagamhanan. Nakatala sab ang Dakbayan sa Mandaue og 85 ka bag-ong kaso sa 283 nga gi-test diin 77 niini ang gikan sa Mandaue City Jail.

Samtang si Lapu-Lapu City Mayor Junard “Ahong” Chan sa nikompirmar sab sa tulo ka labing bag-ong kaso sa Covid-19 sa dakbayan.

Sa iyang post sa Facebook iyang gitataw nga ang tulo ka bag-ong kaso mao ang nagpuyo sa Barangay Pusok, Marigondon ug Basak.

Tungod sa tulo nga nadugang kini maoy naghimo na karon nga 61 nga kinatibuk-ang gidaghanon sa kaso sa Covid-19 sa maong dakbayan. Sa nasayran ang Dakbayan sa Lapu-Lapu gitakli na karon ngadto sa pagpaubos sa General Community Quarantine (GCQ) sugod niadtong Mayo 16, 2020.

Nunot niini hugot nga gipahibawo ni Chan sa mga Oponganon nga bisan kun gipaubos na sa GCQ, sa gihapon angay nga himoon ang pagkamabinantayon batok sa Covid-19 ug iyang giawhag ang tanan sa pagtinabangay ug pagtuman sa gilatid nga mga lagda alang sa paglikay sa pagtakboy sa maong sakit.Decemay P. Padilla ug Romeo T. Limpangog/GMR (BANATNEWS)