Mga polis gi-isolate usab: Alaska gi-lockdown

CEBU, Philippines — Mokabatsa 16 ka mga sitio sa Alaska Mambaling sa dakbayan sa Sugbo ang gipaubos sa lockdown human nagkauyon si Mayor Edgardo Labella ug Kapitan Gines Abellana kagahapon.

Basi sa record, nag-una na ang maong barangay sa mga lugar nga adunay daghang kaso sa COVID-19.

Ang mga sitio nga anaa sa Alaska mao ang Huyong-huyong, Tinabangay, Puntod, San Juan, Kahuyan, Abbya, Naba, Wangyu, Lawis, Ipil-ipil, Tangke, Viking, Alaska Centro, Alaska Proper, Club Kawayan, ug Ybañez Compound.

Matud pa ni Labella, nagkahinabi na sila ni Kapitan Abellana ug nagkasinabot nga moimposar og lockdown sa mga sitio sa Alaska Mambaling.

Sumala pa ni Labella, dako kaayo ang Alaska ug tungod kay i-lockdown kini, ang kagamhanan sa dakbayan mohatag og bugas ug delata ngadto sa mga molupyo.

Dugang pa ni Labella nga mapasalamaton siya nga dinhi sa dakbayan, daghan sa pribadong sektor ang nitunol og hinabang sama sa nahitabo sa Barangay Luz nga gi-lockdown usab sa kagamhanan.

Ang pag-lockdown sa Alaska Mambaling nakaani og mga reaksyon tungod kay ang mga residente sa maong lugar nabalaka sa ila unya nga pangunsumo, ilabina nga lisod gayud ang ilang pagpuyo tungod kay nawad-an sila og  trabaho ug panginabuhian sulod na sa pipila ka bulan.

Samtang ang uban malipayon tungod kay mapugngan na unya ang pagkaylap sa COVID-19 sa ilang lugar.

Isolation

Samtang ipaubos sa Police Regional Office-7 sa isolation ang tanan nga personnel sa San Nicolas Police Station human nga adunay duha ka piniriso niini ang nagpositibo sa COVID-19.

Kini maoy mando ni PRO-7 director Police Brigadier General Albert Ferro kinsa miingon nga dili una pagawson ang tanan nga personnel sa Police Station 6 lakip na ang mga Non-Uniformed Personnel.

“Actually last night they have been temporarily isolated in their police station,” matud ni Ferro.

Adunay 50 ka sakop sa PNP ug 6 ka NUP ang pwersa sa maong police station.

Gikatakda karong adlawa nga ipaubos og swab testing ang mga tanan nga personnel niini.

Si Cebu City Police Office Director Police Colonel Josefino Ligan mipahibalo nga hatagan og pagkaon ug bitamina ang ilang mga sakop aron sa pagpalig-on sa ilang immune system batok sa maong sakit.

Matud pa ni Ligan nga ang mga sakop sa Mobile Patrol Group mao lamang una ang motubag sa mga alarma sa Station 6.

Adunay building atubangan sa police station nga maoy gihimong isolation center sa maong mga personnel samtang wala pa mogawas ang swab sample nga gipaubos sa COVID-19 test kanila.

Gikuhaan na usab og swab sample ang 38 ka piniriso sa Station 6 aron mahibaw-an kung aduna bay natakdan kanila. Gikatakdang mogawas ang resulta karong adlawong Sabado dungan sa resulta sa test sa mga polis.

Gikordon na usab ang tibuok police station gahapon adlawa aron nga walay makasulod niini. Sheriza Mae Uy/LPM (BANATNEWS)