COVID19 update

CEBU, Philippines — Ang Sugbo nalakip sa gikonsiderar sa Inter-Agency Task Force for the Management of Emerging Infectious Diseases (IATF) nga usa sa mga mga high-risk areas nga natakboyan sa coronavirus.

Kagahapong adlawa, si Presidente Rodrigo Duterte miaprubar sa rekomendasyon sa IATF nga lugwayan pa kutob sa Mayo 15 ang enhanced community quarantine sa mga high-risk areas.

Sa report sa Philstar. com, ang tigpamaba sa Palasyo nga si Harry Roque kinsa mao na sab ang gitudlong tigpamaba sa IATF mikompirmar nga giaprubahan sa pangulo ang rekomendasyon.

Sa Sugbo, ang Cebu City maoy dunay kinadaghanan og positibo sa maong sakit nga miabot og 348 ka tawo, lakip sa mga dunay positibo ang Mandaue City ug Lapu-Lapu City. Samtang ang mga kalungsoran niini walay nagpositibo.

Si Gov. Gwendolyn Garcia sa iyang bahin miingon nga di niya igsapayan nga gilugwayan pa ang ECQ sa Sugbo, apan ipadayon niya ang pagplano sa hinayhinay nga pagpabangon sa ekonomiya sa probinsya.

Iyang gihagit ang mga Chamber of Commerce sa Sugbo nga tabangan ang pagpakusog sa industriya a agrikultura sa kalungsoran.

High-risk area

Naapil sa high-risk areas nga mga rehiyon ang National Capital Region, Central Luzon, Calabarzon ug mga probinsya sa Pangasinan, Benguet ,  Albay, Mindoro ug Catanduanes. Apil sab niini ang Panay ug mga probinsya sa Davao Del Norte ug ang Davao City.

Sakop sa maong mga rehiyon sa Luzon ang Bataan, Bulacan, Nueva Ecija, Pampanga, Batangas, Cavite, Laguna, Rizal, Quezon, Oriental Mindoro, Occidental Mindoro, Albay, Catanduanes.

Samtang sa Visayas ang Aklan, Antique, Capiz , Cebu ug Iloilo. Sa Mindanao ang Davao del Norte sama sa Davao City.

Hinuon, dunay kahigayonan nga ini og abot sa Abril 30 mahimo pa silang mous-os sa General Enhanced Community Quarantine nalang kun moubos og maayo ang gidaghanon sa mga natakboyan.

Ubos sa GCQ, luagan na ang pagbantay ug makabalik na og operate ang mga pasaheroan ug mga piniling mga negosyo ug makatrabaho na ang mga tawo apan sa limitadong kapasidad.

Apan di gihapon tugotan mag-operate ang mga balay-kalingawan ug ang pagtapok-tapok sa mga tawo. Kadtong moderate-risk areas ipaubos gihapon sa GCQ kutob Mayo 15 apan kinahanglan pang moagi sila og evaluation.

Ang mga low -risk areas mas luag ang ipatumahg GCQ hangtud Mayo 15 kung walay madugang nga mga kaso sa positibo sa ilang dapit.

Matud ni Roque usa sa mga gibasehan sa rekomendasyon mao ang naestablisar nang minimum health system standards para sa katawhan ug kapasidad nga makaatiman sa mga kompirmadong dunay novel coronavirus.

Apil sab sa gibasehan ang risgo sa outbreak, edad, panglawas, nagunang tinubdan sa panginahanglan ug public transport. Ang lugway sa ECQ epektibo sugod sa Mayo 1 human mapupos ang inisyal nga deadline karong Abril 30.

Base sa talaan sa DOH, miabot na og 7,192 tanan ang nataptan sa maong sakit human nadugangan og 211 ka kaso kagahapon. Samtang miabot na og 762 ang nangaayo human nadugangan og 40 ka mga pasyenteng naayo.

Samtang  adunay nadugang nga 15  ang namatay sa COVID-19 ug naabot na tanan og 477.

Sa tibuok kalibotan, miabot na og kapin 2.7 milyones ang nataptan apil na niini ang 190,858 nga nakalas. /IBM