Kaso sa COVID-19 sa nasud nisaka sa 3,870, patay 182
CEBU, Philippines — Sa ikaduhang adlaw kutob alas 5 kagahapon sa hapon, wala kaabot sa 200 ang nadugang nga kaso sa coronavirus sa Pilipinas human ang Department of Health nakatala lang og 106 ka dugang natakdan sa maong sakit.
Ang COVID-19 nakatakod na og 3,870 ka tawo sa nasud sukad niadtong Enero karong tuiga.
Ang pagsaka sa gidaghanon nagagumikan kini sa gipaspasan nga testing sa mga pasyente.
Nunot niini ang DOH niingon nga sayo pa kaayo nga moingon nga niubos na ang kaso sa COVID-19 sa nasud bisan sa paningkamot sa gobiyerno.
Ang DOH nakatala sab og dugang lima nga namatay diin ang tanan niabot na sa 182 samtang 12 ang bag-ong naka-recover ug ang tanan niabot na sa 96.
Niadtong Martes gilugwayan ang enhanced community quarantine sa Luzon og duha ka semana imbis matapos na kini karong Abril 12.
Samtang mokabat na sa 600 ka Pinoy sa gawas sa nasud ang natakdan sa virus nga karon anaa na sa 594 human dunay 25 ka bag-ong nadugang sumala pa sa Department of Foreign Affairs.
Sa tanan, 164 kanila ang naka-rekober na. Dunay bag-ong tulo ka Pinoy nga namatay sa Amerika ug Uropa hinungdan nga niabot na sa 37 ka Pinoy ang namatay sa gawas sa nasud.
Ang coronavirus pandemic nikalas na og kapin sa 82,000 ka kinabuhi samtang kapin sa 1.4 milyones ka tawo ang natakbuyan lukop kalibutan. /GMR
Related video:
- Latest
