Wanted, kauban napatay sa kapolisan
CEBU, Philippines — Duha ang namatay, usa kanila adunay mga warrants of arrest sa dihang girespondehan sa mga sakop sa Presinto 3 sa Mandaue City Police Office (MCPO) sa Sitio Latasan sa Barangay Labogon Domingo sa gabii.
Si Police Major James Conaco, hepe sa Presinto 3 sa MCPO miila sa napusilan nga gihulagway nga most wanted nga giingong nalambigit sab sa ilegal nga drugas nga mao si Allan Ouano, taga Sitio Cardaba, Barangay Basak.
Matud pa ni Conaco nga adunay pending nga warrant of arrest sa kasong murder, frustrated murder ug homicide si Ouano. Samtang wala pa mailhi ang lalaking iyang kauban nga napatay sab sa kapolisan.
Sumala pa nga dunay mga silingan sa suspek nga nitug-an sa kapolisan bahin sa kadudahang mga lihok ni Ouano kinsa gihulagway nilang armado.
Daling miresponde ang mga sakop sa City Intelligence Branch (CIB) sa MCPO aron pagsusi sa sumbong. Naabtan ang duha sa ngitngit nga bahin sa maong dapit apan sa dihang gisita giingong kalit silang nipabuto ngadto sa mga polis hinungdan nga sila napusilan.
Nakuha sa crime scene ang kalibre 38 nga adunay mga bala ug kabhang nga nahimutang tapad sa nahagba nilang patay’ng lawas. Padayon pa ang kapolisan sa pagsusi sa maong hitabo. /IBM (BANATNEWS)
- Latest
