54 ka COVID tests negatibo
CEBU, Philippines — Gipahibawo ni Gobernador Gwendolyn Garcia nga sa 54 ka swabs nga gi-test kagahapong adlawa sa Vicente Sotto Memorial Medical Center Sub-National Laboratory pulos kini negatibo.
Ang maong swabs gikan sa Probinsya sa Sugbo (21), Cebu City (18), Lapu-Lapu City (8) ug Mandaue City (7).
Moabot usab sa 43,919 ang Persons Under Monitoring sa mga lungsod ug dakbayan sa tibuok probinsiya diin 224 ang Influenza-Like Illnesses (ILI), tulo ang Severe Acute Respiratory Infection (SARI) ug 7,576 ang nakakompleto sa home quarantine base sa Abril 5 nga datus nga natala sa probinsiya.
Pipila sa mga lungsod nga adunay natala nga PUMs mao ang San Remigio nga adunay 2,257; Tabogon dunay 2,792; Pinamungajan 2,875; Barili 2,486; Bogo City 2,366 ug Argao 3,129.
Matud ni Garcia nga daghan ang PUMs karon tungod kay nisumiter na usab ang ubang mga lungsod.
Sa mga provincial ug district hospitals, walo kabuok ang ILI diin ang usa na-admit ug pito ang nakapauli na sa mga balay ug ipaubos sa home isolation, tulo ang SARI diin ang usa anaa sa Camotes District Hospital ug duha sa Daanbantayan.
Sa unang semana sa pagpatuman sa enhanced community quarantine sa tibuok probinsiya, matud ni Garcia nga maayo nga napatuman sa mga mayor ang mga guidelines ug protocols subay sa iyang executive orders.
Taliwala usab sa resulta sa mga swab tests diin gamay lang ang nagpositibo, ang gobernador nagkanayon nga dili angay nga mokompiyansa.
"This is encouraging but let us not be complacent. Let us be more vigilant," matud ni Garcia.
Dili pa usab masulti ni Garcia kun kanus-a magpabilin ang ECQ sanglit ila pa man gi-assess ang sitwasyon sa Sugbo.
Kini usab ang hinungdan nga wala niya gibutang sa iyang EO kun kanus-a lang ang ECQ.
Matud ni Garcia nga dili siya gusto nga mohatag og "false hopes" sa mga Sugboanon pinaagi sa paghatag og petsa apan dili pa gihapon malibkas kay dili pa siyento porsiyento nga luwas ang Sugbo batok sa coronavirus. /GMR (BANATNEWS)
- Latest
