Kagamhanan sa Lapu-Lapu nitanyag og libreng sakay
CEBU, Philippines — Gihangop sa mga Oponganon ang gitanyag nga libreng sakay sa kagamhanan sa Dakbayan sa Lapu-Lapu.
Si Mayor Junard Ahong Chan nitahas sa City Traffic Management Office (CTMS) nga mag-organized og free bus ride sa mga molupyo alang sa ilang pag-adto sa merkado. Ang free ride nga gisugdan niadtong Biyernes ang naglambigit sa 33 bus nga nagdagan nga gibahin usab ngadto sa pito ka mga cluster nga maoy kasakyan sa mga molupyo gikan sa ilang panimalay paingon sa merkado publiko ug sa pagpauli.
Si Mario Napule, pangulo sa CTMS nibutyag nga magsugod ang unang pagbiyahe sa maong mga sakyanan sa alas 8:00 sa buntag hangtud sa alas 8:00 sa gabii. Ang cluster 1 adunay unom ka mga bus nga nagdagan paingon o gikan sa barangay nga naglakip sa Ibo, Buaya, Mactan ug Punta Engaño.
Duha usab ka bus sa Punta Engaño ug Mactan ug laing upat ka mga bus sa Mactan Newtown paingon sa Marina Mall. Ang cluster 2, 4, 5, 6, ug 7 ang nagdagan usab ngadto sa uban pa nga mga barangay sa pagkompleto sa 19 ka barangay sa mainland paingon ngadto sa mall sa dakbayan. /BDB (BANATNEWS)
- Latest