Mga durugista sa Lapu-Lapu ug Talisay sikop sa buy bust
CEBU, Philippines — Walo ka pusher lakip ang 17-anyos nga lalaki ang nasikop sa gipahigayong buy bust operation sa Lapu-Lapu City Police Office (LLCPO). Nasikop sa buy bust operation diha sa Barangay Marigondon sa maong dakbayan si Lino Marzan Amodia, 32-anyos, Jerome Gulama Amodia,19, pulos nagpuyo sa maong dapit ug nasamitan kini og napulo ka pakete nga shabu ug buy bust money.
Samtang sa Barangay Looc sa maong dakbayan kagahapon sa buntag nadakpan ang upat ka pusher ug usa ka 17-anyos nga lalaki ang naluwas sa kapolisan.
Ang upat ka suspetsado mao sila si Jobedrt Gardikano Potot, 24, Edgar Aranas Tumulak, 23, Gian Henry Bagcas Ymbong, 23 ug Ronald Samson Casibao, 25, pulos nagpuyo sa maong dapit.
Giingong nasakmit sa maong mga suspetsado ang napulo ka paketeng shabu, P1,000 nga buy bust money ug P9,000 nga gituohan halin sa ginadiling drugas.
Sa Barangay Pajo sa maong dakbayan niadtong Miyerkules sa gabii nadakpan ang pusher og shabu nga si Jeffrey Ongco Cortes, 36, nagpuyo sa maong dapit nga nakuhaan kini og P13,192 nga kantidad nga shabu, P3,000 nga buy bust money ug P300 nga gituohang halin niini.
Samtang sa Dakbayan sa Talisay, pito ka durugista ang nadakpan sa gihimong checkpoint ug buy bust operation sa kapolisan sa siyudad niadtong Miyerkules.
Niadtong Miyerkules sa buntag nasikop si Mark Amarile Campo, 19-anyos diha sa Barangay San Roque sa maong siyudad ug nakuhaan kini og pinutos nga marijuana atol sa checkpoint sa kapolisan.
Laing mga nasikop diha sa Barangay Tanke sila si Edwin Lebris Reponte diin nakuhaan kini og 5.25 gramos nga shabu; Rodini Racaza Macuto kinsa nakuhaan og 5.15 gramos nga shabu; Jr Noya Bantugan; Klent Bazar Gasalatan; Joveno Daan Bazar Jr. ug Evelyn Saniria Egdamen.
Nikabat ngadto sa 21.75 gramos sa shabu ug 125 gramos nga marijuana nga gibana-banang mobalor ngadto P159,800.25 ang nasakmit sa kapolisan gikan sa mga ulahing suspetsado.
Matud ni Police Major Gerard Ace Pelare, hepe sa Talisay City Police Station nga bisan sa sitwasyon nagpadayon gihapon ang ilegal nga kalihukan sa mga ilegalista. Gabriel C. Bonjoc/BDB (BANATNEWS)
- Latest