Dakbayan sa Sugbo nilusad sa mobile market
CEBU, Philippines — Gilusad sa kagamhanan sa Siyudad sa Sugbo ang Cebu City Mobile Market kabahin kini sa lakang sa siyudad aron malikayan ang paggawas sa mga tawo tungod kay mamalit sa ilang mga panginahanglanon.
Kagahapon gihimo ang paglusad sa mobile market diha sa Plaza Sugbo kinsa si Cebu City Mayor Edgardo Labella ang nitambong sa maong kalihukan.
Nagpasalamat si Labella sa mga manindahay sama sa CEMVEDCO, CCUVA ug uban pa nga nisanong sa mobile market diin 18 ka sakyanan nga dunay karga nga utanon, isda, buwad, prutas ug uban pa ang mosuroy diha sa mga barangay. Si Cebu City Market Administrator Jonil Matuguina nibutyag nga makig-alayon sila sa COVID Task Force nga maoy mohatag og instructions kanila.
Kagahapon sa Barangay Apas una nila gipahimutang ang mobile market apan duna na siya’y nakaestorya nga laing barangay nga gustong magpabutang og mobile market sa ilang lugar sama sa Pamutan, Bo. Luz, Tisa ug Cogon Pardo.
Hangyo ni Matuguina nga hatagan usab sila og oras nga mapahibawo ang mga residente kay lisod nga moadto unya dili makagawas.
Nasuta nga naa na sa 30 ang nisanong sa mobile market ug gilimitahan lang una ni Matuguina tungod kay dili siya buot masayang ang ilang pagtinda unya dili mahurot og kahalin ang ilang baligyaon. /BDB (BANATNEWS)
- Latest
