Batan-ong triathletes mihatag og inspirasyon sa mga frontliners ug pasyente

CEBU, Philippines — Sa kaugalingon nilang paagi, ang mga batan-on nga Sugboanong triathletes nga sila si Dhexia Myle ug Al Dustin Bersabal kauban ang ilang igsuon nga si Xavierra midasig ug mihatag og inspirasyon sa mga frontliners ug ingon man sa mga nag-antos ning coronavirus pinaagi sa paghimo og mga artworks ug posters nga gipahinungod kanila.

Mismo ang ilang mama ug coach nga si Mylene Galo Bersabal ang nasurprisa sa dalaygon nilang binuhatan.

"Happy kaayo ko kay they are aware of this crisis," matud pa ni coach Mai-Mai.

Nakuha sa managsuong Bersabal ang ideya nga mohimo og mga posters ug artworks gikan ni Dr. Nicole Perreras sa RITM (Reserach Institute for Tropical Medicine) nga miawhag sa tanan paghimo og paagi nga makadasig sa mga frontliners ug ingon man sa mga pasyente  taliwala ning COVID-19 pandemic.

Si Dhexia, 13, ug si Al Dustin, 9, parehong nga sumulbong nga bitoon a triathlon gikan sa Sacred Heart School-Ateneo de Cebu.

Nagkanayon si Dhexia nga naghimo siya og artwork aron dasigon ang mga pasyente nga magpabiling lig-on. Iya sab kini pamaagi aron ipadayag sa mga frontliners ang iyang pagdayeg sa ilang pagsakripisyo sa ilang kinabuhi alang sa kaayohan ug kaluwasan niadtong mga naapektohan niining kalibutanhong krisis panglawas.

Alang ni Dustin, iyang gibati nga ang tanan nga nagserbisyo sa nasud ning panahon sa krisis mga bayani nga dunay talagsaong abilidad.

"We want to show our appreciation on the effort and determination they put in everything they do to secure the well-being of the people. We love you our modern day heroes!," batbat pa ni  Xavierra.