Patay human mipiyansa

CEBU, Philippines — Gihimakak sa Balamban Police Station ang pasangil nga pagpangulata nga niresulta sa pagkamatay sa usa ka dinakpan sa ilegal nga sugal niadtong Domingo sa Sitio Buhing Tubig, Barangay Buanoy, Balamban.

Giila ang dinakpan nga namatay nga si Arnel Marcellones, 29-anyos, nagpuyo sa maong lugar.

Matud sa hepe sa Balamban Police Station, Police Major Christian Torres, nga niadtong Domingo nakadawat sila og impormasyon kalabot sa ilegal nga sugal sa maong barangay.

Atol sa pagronda nagdinaganay ang mga tawo apan duha ang nakuptan sa kapolisan nga sila si Fritz Ian Ricafort ug Marcellones nga giingong nanukol.

Dugang pa ni Torres nga tungod kay bakilid ang lugar ug nidagan ang duha nga nagligidligid paingon sa ubos, naigo sa bato ang tiyan ni Marcellones hinungdan nga aduna kini mga bun-og sa lawas ug nagrabehan ang tiyan.

Sa dihang gidala kini ngadto sa prisohan nagsige og reklamo si Marcellones nga sakit ang iyang tiyan hinungdan nga gidala sa tambalan.

Way problema

Gibutyag ni Torres nga walay dakung problema nga nakita ang mga doktor sa reklamo ni Marcellones base sa resulta.  Sa dihang nipiyansa pagka Lunes si Marcellones sa korte, nasayran sa kapolisan nga namatay kini pag-abot sa balay.

Apan base sa impormasyon nga nadawat sa Banat News pinaagi sa usa ka concerned citizen giingong gikulata si Marcellones sa mga polis atol sa pagkasikop niini niadtong Domingo.

Kini ang hinungdan nga mimando si Cebu Provincial Police Office (CPPO) Director Rhoderick Mariano sa pagpahigayon og imbestigasyon ug pagpresentar sa autopsy ni Marcellones.

Gibutyag sab ni Mariano nga mamahimo nga parelibohan niya ang upat ka operatiba atol sa pagsugod sa imbestigasyon kalabot sa maong pasangil nga pagpangulata ngadto sa dinakpan. /GMR (BANATNEWS)