Nangadakpan sa curfew gipa-rosaryo

CEBU, Philippines — Gipa-ampo ang mga nakalapas sa curfew sa Dakbayan sa Danao pinaagi sa pagpangadye sa Holy Rosary sa wala pa gipapauli sa ilang panimalay.

Kini gihimo sa kapolisan isip paagi sa paghinulsol sa nahimo nilang kalapasan sa lagda nga gipatuman nga curfew ug enhance community quarantine alang sa paglikay sa pagtakboy sa coronavirus disease (COVID) 2019.

“We have done other ways just to discourage the public to go out but nothing works. There were still people strolling the streets at night, especially minors. But when we started doing the rosary for those who were caught,” matud ni Police Lieutenant Colonel Maribel Getigan.

Nagsugod sa ilang pagpatuman sa curfew ang kapolisan sa alas 8 ang takna sa gabii hangtud sa alas 5 ang takna sa buntag niadtong Marso 17 isip pagpugong sa pagkuyanap sa COVID-19.

Dugang pa niya nga sukad sa ilang pagsugod sa pagpatuman maoy ilang nasikop ang 132 ka molUpyo nga naglakip na niini ang pipila ka mga minors nga ilang naluwas.

Si Getingan niingon nga niadtong niaging gabii maoy ilang nasikop ang 12 ka tawo nga nakahimo gihapon sa maong kalapasan nga ilang gipaampo sa Ginoo pinaagi sa pagpahigayon og Holy Rosary sa dili pa tugutan sa pagpauli.

Matud ni Getigan nga gawas sa pag-rosaryo ilang gipaubos sa lecture nga molungtad og duha ka oras isip sa pagpasabot sa kamahinungdanon sa ECQ sa dili pa nila ihatud ngadto sa ilang panimalay.

Ang maong mga dinakpan ilang gitapok sa usa open space nga nahimutang duol sa ilang buhatan sa Barangay Poblacion nga nagsilbi nilang police holding area.

Way q pass

Samtang niabot sa 74 ka indibidwal ang nadakpan human nasakpan nga naglaroy-laroy sa kadalanan nga walay quarantine pass sa Dakbayan sa Talisay.

Si Police Major Gerard Ace Pelare, hepe sa Talisay City Police Station, nibutyag nga gipalihok gyud niya ang iyang mga sakop aron madisiplina ang katawhan.

Daku sab og tabang ang mga barangay tanod ingon man force multipliers nga nipatuman sa lagda nga anha lang gyud sa panimalay ang katawhan samtang gipakigbatokan ang COVID-19 nga mokuyanap.

Ang labing daghan nga nadakpan mao ang Barangay Linao nga adunay 11 ka tawo nga gidakop.

Nisunod ang Barangay Biasong ug Maghaway nga adunay tag siyam ang nadakpan ug ang Barangay Poblacion nga adunay walo nga gisundan sa Barangay Dumlog nga adunay unom.

Nalipay si Pelare kay nakita niya ang pagtinabangay sa matag barangay aron ang katawhan madisiplina.

Ang mga dinakpan gidala sa Cansojong basketball gym aron sa profiling. Gabriel C. Bonjoc/GMR (BANATNEWS)