Barangay dili motuman sa mando kasohan

CEBU, Philippines — Ang Department of Interior and Local Government nipahimangno ngadto sa mga opisyal sa barangay nga mangunay sa pagpatuman sa home quarantine ug uban pang polisiya ug lakang batok sa covid-19.

Si Leocadio Trovela, direktor sa DILG-7 nagkanayon nga ang taga barangay maoy mag-una pagsiguro nga napatuman ang quarantine guidelines lakip niini ang strikto nga social distancing.

Ang mga opisyal sa barangay nga makalapas sa maong kamandoan ang mag- atubang og tukmang kaso.

Si Trovela niawhag sa publiko nga motug-an ngadto sa ilang buhatan kalabot sa mga opisyal sa barangay nga nilapas sa national policies batok covid-19 ug nipahimulos sa sitwasyon karon.

Sa laing bahin, gitugotan na ni Gobernador Gwendolyn Garcia ang mga empleyado sa grocery stores ug supermarkets nga makasulod ug gawas sa boarders sa Probinsiya sa Sugbo.

Sa iyang bag-ong giluwat nga Executive Order No. 5-O-1 apil sa mga exempted na karon mao ang mga personnel nga nagtrabaho sa mga grocery stores ug supermarkets, drugstore, restaurants, bakeries, fast food chains ug pizza chains.

Hatagan usab og exemptions ang funeral services sama sa empleyado sa funeral parlor, immediate family sa namatay, officiating priests, imams, pastors, ug ubang religious minister.

Kinahanglan usab nga istriktong obserbaran ang social distancing. /BDB (BANATNEWS)