P375 milyones hinabang sa kapitolyo
CEBU, Philippines — Mokabat sa P376 milyones ang ihatag sa Kapitolyo sa tanang local government units sa Lalawigan sa Sugbo isip ayuda sa mga residente tungod sa epekto sa coronavirus disease (COVID-19).
Matud ni Gob. Gwendolyn Garcia nga ang ihatag sa Kapitolyo gibase sa kategoriya sa income class sa usa ka munisipyo o siyudad sanglit adunay LGUs nga mas datu itandi sa uban.
Ang gahin gikwenta matag tawo o capita diin ang first hangtud third class nga siyudad makadawat og P50 matag tawo. Ang fourth hangtud sixth class makadawat og tag P100 matag tawo.
Ang first class municipality tag P100 ang matag tawo; ang second ug third class municipality tag P150 samtang ang fourth ug fifth class municipality gigahinan sa Kapitolyo og P200 matag tawo.
“We decided to give them cash aron sila na mismo, matagaan sila og flexibility nga diha-diha makapalit sa gikinahanglan nga basic necessities sa ilang mga constituents,” matud ni Garcia.
Posible karong semanaha ihatag sa Kapitolyo ang maong ayuda.
Samtang dili angay mabalaka ang mga taga probinsiya nga adunay sakit ug kinahanglang magpatambal sa Dakbayan sa Sugbo tungod kay apil sila sa exempted sa borders sa probinsiya.
Matud ni Garcia nga kinahanglan adunay pagtugot gikan sa mayor ang pasyente ug dunay medical certificate nga ipakita ngadto sa mga polis nga anaa sa checkpoints. /GMR (BANATNEWS)
- Latest