Garcia: Walay liquor ban apan dili ang tapok aron mag-inom
CEBU, Philippines — Si Gobernador Gwendolyn Garcia dili mopatuman og liquor ban taliwa sa pagpaubos sa tibuok Lalawigan sa Sugbo og enhanced community quarantine tungod sa coronavirus disease (covid-19).
Matud ni Garcia nga adunay uban nga nanginahanglan og alcohol hilabina kon adunay gibati nga depresiyon apan kinahanglan nga naa ra sa sulod sa balay mag-inom ug dili magpatapok og kainom.
Giklaro ni Garcia nga gidili ang pag-inom diha sa gawas uban ang mga barkada.
Matud usab ni Garcia nga gidili usab ang moadto sa laing balay para makig-inom tungod kay paadtoan kini og polis aron pangsikopon.
“Sige lang, mga silingan sumbong mo kay padad-an dayon nato didto og polis, ipadakop man gyud ta mo. Ipasulod ta mo og usa ka selda magtapadtapad mong tanan ug padad-an ta mo og napulo ka karton sa Tanduay ipahurot gyud na nako ninyo”, bahad ni Garcia.
Si Garcia nagkanayon nga dili karon panahon sa pag suroy-suroy tungod sa krisis dala sa covid-19.
“Wa say tsismis ron, utro pud nang virus-sa na, undanga sa na. Dili na mo pwede manumbalay”, pasidaan ni Garcia. /BDB (BANATNEWS)
- Latest
