Palma niawhag og sakripisyo ug pag-ampo

CEBU, Philippines — Si Archbishop Jose Palma sa Archdiocese of Cebu niawhag sa katawhan og sakripisyo niining giatubang nga kalibutanan nga problema nga mao ang covid-19.

Matud ni Palma nga niining kalibutanon nga problema kinahanglan ang sakripisyo ug angay mosunod ang katawhan sa mga kamandoan ug dili lang kini ibalewala tungod kay wala kanato ang control.

Gidasig ni Palma ang katawhan nga magpabilin sa ilang panimalay ug likayan ang pagtapok-tapok diha sa gawas aron malikayan ang covid-19.

Gidasig ni Palma ang katawhan nga padayon gihapon sa pag-ampo ug pagsunod sa mga misa nga ipadungog sa dyRF 1215 sa alas 6:00 sa buntag ug alas 12:00 sa udto gikan sa Lunes hangtod sa Biyernes.

Samtang sa Sabado ug Domingo sa alas 6:00 sa buntag, alas 12:00 sa udto ug alas 6:00 sa gabii.

Sa laing bahin, ang misyonero nga pari nga si Padre Diderick Andrinjatovo, SVD niawhag  usab sa katawhan nga i-transform ang ilang mga kabalaka ngadto sa pag-ampo atol sa misa nga gipahigayon niini online sa DyRF1215. Matud ni Andrinjatovo nga niining panahon sa covid-19 pandemic daghang mga pangutana ang nitumaw, mga kahingawa ug kabalaka lakip usab ang pagpahigayon og binasulay sa mga panghitabo, daghan na ang nag-panic nga normal ra sa tawo ug nagpakita kini nga kita huyang ug nagkinahanglan sa panabang sa Ginoo.

Niining panahon sa mga kabalaka kinahanglan kining mohunong sa makadiyot ug mamalandong kay anaa ang Ginoo andam maminaw sa iyang pinalangga nga katawhan.

Nining panahon sa pandemic sa covid-19 anaa pa kita sa panahon sa semana santa hinungdang  mas haom ug maayo nga magpadayon ang pag-ampo sa hilom kay kahimut-an kini sa Ginoo ug pagtabang sa mas labing nanginahanglan ug frontliners nga dili na kinahanglan ipahibalo sa kadaghanan. /BDB (BANATNEWS)