Dakbayan sa Lapu-Lapu adunay igong food supply
CEBU, Philippines — Gipaniguro ni Mayor Junard Ahong Chan nga adunay igong food supply alang sa mga Oponganon sugod sa adlaw sa pagpatuman sa enhanced community quarantine hangtud na sa adlaw nga pagtapos niini.
Kini maoy gipadayag ni Chan ngadto sa mga kapitan sa 30 ka barangay nga naglakip sa Isla sa Olango ug mainland atol sa tigom nga gipahigayon.
Gipasabot ni Chan ang giluwatan niya nga executive order nga pagpaubos sa dakbayan sa enhanced community quarantine human usab niya madawat ang taho kalabot sa “presumptive positive” sa covid-19 nga molupyo.
Gitataw ni Chan nga magsugod sa alas 12:01 sa kadlawon karong Domingo, Marso 29, 2020 ang pagpatuman sa enhanced community quarantine kini aron kapugngan ang pagkuyanap sa covid-19.
Ang kagamhanan sa dakbayan nakapahigayon na sa pag-apod-apod og mga relief good ngadto sa mga molupyo sa 11 ka barangay sa Isa sa Olango ug ingon man sa 19 ka barangay sa mainland.
Matud ni Chan nga sa unang pagpang-apod-apod og relief goods nikabat sa 8,000 ka tawo ang nakadawat niini nga nagtrabaho sa tourism sector nga naglakip kanila ang mga boatmen, local tour guides, souvenir vendors ug mga tigpanggama niini sa kabarangayan kinsa naapektohan ang panginabuhi tungod sa coronavirus pandemic.
Samtang sa Barangay Basak sa Dakbayan sa Mandaue, ang mga bodega sa bugas ang gihugopan usab sa mga mamalitay kinsa mamalit og sinakong bugas sa pagpangandam sa gikatakdang lockdown sa Lalawigan sa Sugbo.
Ang mga mamalitay nga naggikan sa amihanang kalungsoran nga nagdala og sakyanan ang namalit og mga sinakong bugas nga maoy nakaingon usab sa pahuot sa dalan nga nagpaingon sa amihanang bahin. /BDB (BANATNEWS)
- Latest