Nagpaburot sa presyo sa alcohol ug sanitizer sikop sa buy–bust

CEBU, Philippines — Laing tulo ka tawo ang nasikop sa gipahigayon nga buy bust operation sa Criminal Investigation and Detection Group (CIDG)-7 kinsa nagpaburot sa presyo sa alcohol ug sanitizer.

Unang operasyon ang gipahigayon sa sakop sa Metro Cebu Field Unit nga gipangulohan ni Police Lieutenant Colonel Niño Lope Briones diin duha ka tawo ang nasikop diha sa Block 3, IT Park Barangay Apas, Dakbayan sa Sugbo.

Ang mga suspetsado mao sila si Allin Sencio, 33-anyos, taga  Barangay Basak San Nicolas Dakbayan sa Sugbo ug Agustin Pedrosa Jr. 41, taga Barangay Lahug, Dakabayan sa Sugbo.

Matud ni Briones nga nakadawat sila og impormasyon kalabot sa pagpamaligya og alcohol ug sanitizer sa mga suspetsado diin gipaburot niini ang presyo.

Ang kapolisan nakig-transaction sa mga suspetsado pinaagi sa pagpalit og alcohol ug sanitizer diha sa online ug gi-meet up nila kini.

Sa maong operasyon nasakmit sa mga polis gikan sa mga suspetsado ang 76 ka gallon sa 70% ethly alcohol nga gisulod sa 10 ka box, 10 ka box sa surgical mask ug mga halin.

Sa laing operasyon nga gipahigayon sa Lapu Lapu City Field Unit diha sa Barangay Pajo Dakbayan sa Lapu-Lapu nasikop di Jade Balberona, 31, taga Barangay Duljo Fatima, Dakbayan sa Sugbo.

Matud ni Police Major Lirio Coral, hepe sa Lapu-Lapu City Field Unit nga gikatransaksiyon nila si Balberona pinaagi sa social media diin nakig-meet up lang kini dala ang mga alcohol.

Giingong ang maong mga alcohol gibaligya kini sa suspetsado og P850 matag galon o gipaburot ngadto sa 70 porsyento ang presyo niini.

Nasakmit sa mga polis gikan sa suspetsado ang 24 ka galon nga alcohol, 150 ka disinfectant solution ug laing 470ml nga alcohol.

Sa kinatibuk-an ubos sa Suggested Retail Price (SRP) mobalor ngadto sa P19,692 ang kantidad sa maong mga alcohol apan gipaburot nila kini ngadto sa P54,900.

Ang mga suspetsado pasakaan kini og tukmang kaso sa nahimo nilang kalapasan. (FDA). /BDB (BANATNEWS)