74 na ka establisamento temporaryong nisirado
CEBU, Philippines — Kapin sa 2,000 ka empleyado ang apektado sa temporaryo nga pagsirado sa pipila ka mga establisamento tungod sa problema sa Corona Virus Disease 2019.
Kini ang gitug-an ni Labor Information Officer Luchel Senarlo-Taniza sa Department of Labor and Employment (DOLE) nga nahinabi sa Banat News.
Matud ni Taniza nga 74 na ka establisamento ang nipadala kanila og report kalabutan sa temporary closure.
Ang mga nipadala og temporary closure mao ang mga restaurant, manufacturing ug resort diin kasagarang customers mga langyaw. Giingong ang 74 ka establisamento aduna kini 2,184 ka trabahante kinsa nawagtangan karon sa trabaho. Gitug-an usab ni Taniza nga nikabat na sa 19, 629 ka mga empleyado gikan sa 321 ka kompaniya ang nipaubos karon sa flexible work hours.
Sa pagkakaron padayon pa ang ilang pagsuta sa mga lista ug pangalan sa mga maka-avail sa financial assistance gikan sa DOLE nga P5 mil base sa guidelines nga giluwatan sa ilang ulohan nga buhatan.
Sa laing bahin, si Mayor Junard Ahong Chan sa Dakbayan sa Lapu-Lapu nipadayag sa iyang kasagmuyo tungod kay wala mosunod sa ilang kasabutan ang mga kompaniya sa Mactan Economic Zone (MEZ) sa paghatag og sakyanan nga mohakot sa mga kawani nga mohatud kanila sa panahon sa ilang pagpamauli.
Matud pa ni Chan nga ilang gitugotan ang mga establisamento nga magpadayon sa ilang operasyon apan ilang sundon ang protocol sa kagamhanan alang sa anti –covid 19.
Naglakip na niini ang pagsuta sa health condition sa ilang mga kawani pinaagi sa pagpaubos kanila sa thermal scanning, pag-disinfect ug tumanon ang social distancing sa ilang gitrabahoang lugar. Sa laing bahin usab, giingong 100,000 ka empleyado sa MEZ 1 sa Barangay Pusok, MEZ 2 ug Cebu Light Industrial Park sa Barangay Basak ang maapektohan kong ugaling temporaryong magsirago ang mga establisamento diha sa lugar. Romeo T. Limpangog/BDB (BANATNEWS)
- Latest