Kagawad mi-esmiringhoy sa kapuyo sa silingan ‘sikop

CEBU, Philippines — Gireklamo ang usa ka konsehal sa Barangay Balungag, lungsod sa San Fernando human siya nasakpan nga iyang kuyog sa sud sa usa ka lawak sa motel ang kapuyo sa ilang silingan.

Usa ka construction worker nibutyag sa Banat News nga gidungog na gyud sa ilang lugar ang iyang kapuyo nga karelasyon sa konsehal sa maong barangay.

Ang iyang kapuyo nga 39 anyos, usa ka casual employee sa munisipyo nga nadestino sa Barangay Affairs.

Wala  unta niya kini tagda apan hangtud nga nasundan niini ang duha nga nanulod sa usa ka lodging house niadtong Marso 9 ning tuiga.

Matud pa niya nga wala siya kasabot sa iyang gibati hinungdan nga nitawag lang sila sa kapulisan aron ipa- blotter ang panghitabo.

Pirme siyang wala sa balay tungod sa trabaho ug Sabaod ug Domingo ra siya makauli maong makahigayon pirme og esmiringhoy ang duha.

Si Kapitan Emilio Buro nitug-an nga gisuwayan na nila nga husayon ang managkapuyo apan wala mitunga sa hearing ang babaye niadtong Huwebes sa buntag. Sigon pa ni Buro nga iya lang pud nga gidapit ang konsehal aron makahigayon sa pagpasabot sa nanggawas nga estorya apan wa sab kini mitunga sa maong husay.

Siya nitataw nga wa gyud siya magkuwang sa pagtambag sa konsehal kay unta sila maoy modelo sa ilang barangay isip gipiling lider. Hinuon sa iyang pakighinabi sa konsehal mihimakak  gyud kini nga aduna silay relasyon sa maong ginang.

Ang reklamante nidugang nga dili niya mapasaylo ang duha ug iyang isumbong sa Department of Interior and Local Government ILG ang konsehal ug ngadto sa mayor ang iyang kapuyo.

Sa pagsuwat ning balita, gisuwayan sa pagkuha og habig sa Banat News pinaagi sa text ang duha nga gireklamo apan ang duha wa mo reply ug di sab motubag sa tawag. /IBM (BANATNEWS)