Mga malls sirado na, supermarkets, botika abli

CEBU, Philippines — Pipila ka malls sa Dakbayan sa Sugbo ang temporaryo nga magsira apan magpabilin nga bukas ang ilang mga grocery stores ug pharmacy alang sa mga basic needs.

Ang SM Seaside City Cebu nitug-an nga isip suporta sa lakang sa gobiyerno batok sa COVID-19 temporaryo silang nanira sugod kagahapon.

Ang Ayala Center Cebu ug Ayala Malls Central Bloc temporaryo usab nga manira karong adlawa apan bukas ang drugs stores, supermarkets, banks ug convenience store. Tubag kini sa Executive Order No. 056-A ni Cebu City Mayor Edgardo Labella sugod kagahapon nga nagpasirado una sa mga malls gawas lang sa grocery stores, supermarkets, banks, money transfers, pharmacies, ug hardwares apan kinahanglan mouli dayon kun mahuman na sa tumong ug tuyo ingon man transaksiyon.

Giklaro ni Labella nga ang mga establisemento nga sakop sa EO No. 056-A ang mga naninda og ilimnong makahubog sama sa night clubs, bars, taverns, cocktails lounges, beer parlors, pubs, entertainment ug recreation activities ug mga lugar sama sa live performances, events or exhibits alang sa public viewing, art galleries, concert, opera, o dance production, operation sa concert ug theatre halls ug ubang arts gidid-an unang mo-operate.

Gidid-an

Laing gidid-an sa pag-operate ang mga gambling facilities sama sa casinos, bingo halls, video gaming terminals, ug provision sa gambling services sama sa lotteries ug off-track betting; fitness centers, gym, dance studio ug ubang fitness classes.

Temporaryo usab nga ihunong ang operasyon sa spas, hair saloons, barbershops, massage parlors, facial clinics ug aesthetic centers, internet cafes, gaming arcades, videoke o karaoke bars o rooms, sport centers, country clubs ug golf clubs.

Gibalik sab sa pagpahibawo ni Mayor Labella ang EO No. 57 nga nag-waive temporarily sa market fees sa Cebu City sulod sa gidugayon sa general community quarantine. Nagpagawas sab og Memorandum No. 2020-244 ang mayor ngadto kang Atty. Jared Limquiaco, pangulo sa Business Permit Licensing Office, alang sa suspension sa processing sa permit ug licensing applications.

Epektibo ang maong kamanduan hangtud sa Abril 14 o kaha hangtud nga ang general community quarantine malibkas may kalabutan sa COVID-2019. Decemay P. Padilla/GMR (BANATNEWS)