Sidewalk patindahan sa mga vendors sa nigh market

CEBU, Philippines — Gipasalig sa kagamhanan sa Siyudad sa Sugbo nga dili mawagtangan sa panginabuhian ang dul-an 1,000 ka manindahay sa Colon Night Market human kini gipahunong tungod sa Coronavirus Disease 2019. Kagahapon sa buntag giestorya ni Cebu City Mayor Edgardo Labella ang manindahay gawas sa Cebu City Hall.

Matud sa mayor nga duna na sila’y nakita nga pwesto sa mga sidewalks sa siyudad nga dili makababag aron anha makapamaligya ang mga manindahay sugod karong Sabado gikan sa alas 9 sa buntag hangtud sa alas 7 sa gabii.

Apan giklaro sa mayor nga kinahanglan ang mga manindahay mosunod sa guidelines nga gipatuman sa kagamhanan sama sa pagbutang og disinfectant, magsul-ob og mask ug uban pang panagang sa virus.

“As long as they comply atong gitagaan sila si Raquel Arce ug Jonil Matugina og certain guidelines nga makabalik sila og paninda katong sidewalk,” matud ni Labella.

Ang gihimo ni Labella gikalipay og daku sa mga manindahay kinsa nabalaka nga sila mawagtangan og panginabuhian. /GMR (BANATNEWS)