Mga parti sa CSCR nga accident prone ayohon

CEBU, Philippines — Gisugdan kagahapon sa pag-ayo ang mga parti diha sa Cebu South Coastal Road habig sa Dakbayan sa Talisay nga giila nga accident prone area. Ang pagtrabaho giatol kini sa gabii aron dili makabalda sa trapiko diin diyotay usab ang mga sakyanan nga moagi. Si Jonathan Tumulak, hepe sa City of Talisay-Traffic Operation and Development Authority (CT-TODA) nagkanayon nga aspaltohon sa Department of Public Works and Highways (DPWH) ang nahisgutang mga parti ug  butangan usab kini og mga solar stud nga magsiga panahon sa kagabhion.

Matud ni Tumulak nga sulod sa usa ka buwan ang pagtrabaho apan nipasalig ang DPWH nga humanon nila kini sa dili pa ang target nga adlaw sa paghuman. Gihangyo ni Tumulak ang mga motorista sa pagsabot ug pag-amping kanunay sa ilang pagmaneho. – Gabriel C. Bonjoc/BDB

Sable: Paghawan sa karsada nakatabang

Gihulagway ni Kapitan Joel “Jojo” Sable sa Baranggay Suba nga dako og tabang ang kamandoan nga gihatag sa buhatan sa Department of Interior and Local Government sa pagpahawan sa dalan.  Matud ni Sable nga tungod sa pagkahawan sa kadalanan walay nakabalda sa pagsulod sa fire truck atol sa nahitabong sunog diha sa ilang lugar. Si Sable nagkanayon nga kong wala pa mahawani ang kadalanan dako unta kaayo ang mahimong kadaot nga mahibilin sa sunog tungod kay dili man dayon mapawong ang kayo kong nalangan pa ang mga fire truck sa pagsulod diha sa lugar nga nasunogan.

Si Sable nagkanayon nga ilahang tutokan karon ang mga balay nga nilapas diha sa kadalanan aron molapad pa ang ilang karsada.

Makig-alayon si Sable sa kagamhanan sa siyudad aron kadtong mga tag-iya og luna dili molapas sa pagpatukod sa ilang balay diha sa karsada. /BDB (BANATNEWS)