Drayber sa PUJ nigisi sa citation ticket kasohan
CEBU, Philippines – Natingkagol sa detention cell sa Talisay City Police Station ang usa ka drayber sa public utility jeep (PUJ) human kini giingong nigisi sa citation ticket nga giisyu kaniya tungod sa kalapasan sa trapiko.
Ang nasikop mao si Joselito Sabriso, hingkod ang panuigon, taga Lungsod sa Minglanilla.
Si Sabriso gisita kini sa enforcer diha atubangan sa simbahan sa St. Joseph Parish sa Barangay Tabunok, Dakbayan sa Talisay.
Si Renaldo “Tayox” Limbaga sakop sa City of Talisay-Traffic Operation and Development Authority (CT-TODA nagkanayon nga namasahero si Sabriso dihang nihunong kini diha sa pedestrian lane.
Si Limbaga nisita kang Sabriso ug gisultihan ang maong drayber sa iyang kalapasan nga obstruction to pedestrian.
Sa maong kalapasan giisyuhan og citation ticket si Sabriso apan giingong nasuko kini ug wala morespeto sa enforcer ug gigisi ang citation ticket nga giisyu kaniya.
Si Limbaga dali kining nipatawag og backup ug gisikop si Sabriso.
Si Sabriso gikatakdang pasakaan og kasong “Disobedience of Person in Authority”.
Ang maong insidente dili maoy unang hitabo diin sayo pa usa ka drayber sa taxi ang napasakaan og samang kaso tungod sa paggisi usab sa citation ticket nga giisyu kaniya sa enforcer tungod sa kalapasan sa trapiko. /BDB (BANAT NEWS)
- Latest