Tiilan sa ikaupat nga taytayan ipabalhin ni Ahong

CEBU, Philippines —  Gipahibawo ni Lapu-Lapu City Mayor Junard “Ahong” Chan ang tinguha nga pagsugyot kang Presidente Rodrigo Duterte nga makonsiderar ang pagbalhin sa dapit nga butangan sa ikaupat nga taytayan nga manukad sa Dakbayan sa Mandaue.

Kini human niya nakita nga makadugang sa suliran sa trapiko ang kasamtangang naa sa plano tungod kay nahimutang sa 900 metros nga gilay-on sa viaduct sa Marcelo Fernan Bridge nga nagdugtong sa duha ka dakbayan.

Matud ni Chan nga iyang gisugyot nga ang tiilan sa ikaupat nga taytayan adto kini ipahimutang sa 2.5 kilometros nga gilay-on gikan sa Marcelo Fernan Bridge sa Barangay Pusok sa Dakbayan sa Lapu-Lapu.

Sumala pa ni Chan nga nitumaw ang maong sugyot human sa pagpakigtagbo sa Sugboanong magpapatigayon nga nakapanglantaw sa grabe pa nga paghuot sa mga sakyanan hangtud sa pagtapos ang kaugmaran sa ikaupat nga taytayan.

Ang ikatulo nga taytayan nga magdugtong sa Dakbayan sa Sugbo ug Lungsod sa Cordova ang gikatakdang mahuman karong tuig 2021. GMR (BANATNEWS)