90 ka ilegalista sikop sa Talisay

CEBU, Philippines — Nikabat sa 90 ka tawo kinsa nakalapas sa balaod ang nadakpan sa Dakbayan sa Talisay sulod sa tulo ka adlaw nga operasyon sa kapolisan.

Ang kapolisan nipahigayon kini sa Synchronized and Enhanced Managing Police Operations (SEMPO) inubanan sa Oplan Limpyo Talisay sugod niadtong Miyerkules hangtud sa Biyernes ubos sa kamandoan ni Police Brigadier General Albert Ignatius Ferro.

Si Police Major Gerard Ace Pelare, hepe sa Talisay City Police Station nagkanayon nga upat ka search warrant ang ilang gipatuman batok sa mga nagpabilin nga High Value Individual (HVI).

Sulod sa 22 ka operasyon labot sa ilegal nga drugas 41 ang nasikop lakip na niini ang Sangguaniang Kabataan (SK) chairwoman ug ang iyang amahan nga kanhi barangay tanod sa Barangay Lawaan 3.

Usa ang napatay sa operasyon samtang niabot sa P449,684 ang kantidad sa ilegal nga drugas nga ilang nasakmit. Samtang 42 ka sugarol ang nasikop sa kapolisan sa ilang operasyon batok sa ilegal nga sugal.

Pito usab ka wanted person ang nadakpan kinsa nakuhaan og duha ka armas.

Matud ni Pelare nga namalhin ang mga player sa ilegal nga drugas gikan sa Barangay Tanke ug San Roque ngadto na sa ubang mga barangay hinungdan nga padayon ang ilang pagsunod kanila.

Gawas niini, ang programa kalabotan sa paglikay sa ginadiling drugas ang ilaha usab nga gipadayon aron mausab na ang imahen sa Dakbayan sa Talisay.

Gani ang barangay Tapul maoy ipaubos sa validation sa sunod semana kong madeklara ba kini nga drug cleared barangay. /BDB (BANATNEWS)