Tulo ka online trafficker gisilotan sa korte

CEBU, Philippines — Tulo ka inahan nga online trafficker ang gihukman sa korte nga mabilanggo ug pabayaron usab kini og multa.

Ang maong mga inahan nakalapas kini sa Akta Republika 9208 nga giamendar sa Akta Republika 10364 kun “Anti-Trafficking in Persons Act”, Akta Republika 9775 kun “Anti-Child Pornography Act”, Akta Republika 10175 kun “Cybercrime Prevention Act” ug Akta Republika 7610 kun “Anti-Child Abuse Law”.

Si Regional Trial Court (RTC) Judge Christine Muga-Abad sa Branch 70 sa Dakbayan sa Lapu-Lapu niadtong Miyerkules ang nikonbikto sa maong mga inahan kinsa nagpahigayon og live streaming sa mga bata nga ilaha usab nga mga anak bugti sa kantidad sa salapi.

Usa sa mga nakonbikto ang 22-anyos kinsa gihukmang mapriso sulod sa 23 ka tuig ug pabayaron kini og P600 mil nga moral and exemplary damages.

Ang maong inahan nasikop kini niadtong Marso 26, 2018 samtang nagpahigayon og online sexual exploitation lakip sa 4-anyos niyang anak nga babaye.

Laing nakonbikto ang 36-anyos kinsa gihukmang mapriso sulod sa 37 ka tuig ug ang 27-anyos kinsa gihukman usab nga mabilanggo sulod sa 23 ka tuig ug pabayaron usab sila og P600 mil nga danyos.

Giingong ang maong mga inahan niunay og bugaw sa ilang mga menor de edad nga anak diha sa online.

Ang nahisgutang mga inahan ni-plead guilty sa mga kaso nga gipasaka batok kanila subay sa plea bargaining agreement.

Nangulo kaniadto sa operasyon batok sa nahisgutang mga online trafficker ang Philippine National Police’s Women and Children Protection Center – Visayas Field Unit, uban sa pakig-alayon sa  Inter-Agency Council Against Trafficking (IACAT)-7, Department of Social Welfare and Development (DSWD)-7,  Regional Anti-Cybercrime Group-7,  Lapu-Lapu City Police Office ug International Justice Mission (IJM). /BDB (BANATNEWS)