Tulo ka kilong shabu

CEBU, Philippines – Tulo ka kilong shabu nga mokantidad og sobra P20 milyones ang nasakmit sa kapolisan sa giingong bodegero sa shabu atol sa gihimong buybust operation sa mga sakop sa City Drug Enforcement Unit sa Cebu City Police Office kagahapon sa hapon.

Ang nadakpan mao si Elmer Bas Gallarde,35, alyas “Bodol/Bordz” nagpuyo sa JM Basa, Barangay Sawang Calero, Siyudad sa Sugbo. Ang suspek nadakpan sa grupong gipangulohan ni Police Major Jonathan Taneo alas 5:45 sa hapon diha sa 6th Street sa Barangay Apas, Dakbayan sa Sugbo.

Matud pa ni Taneo nga si Gallarde bodegero sa sindikato sa ilegal nga drugas. Siya sab ang modala niini kung adunay transakyon tali sa iyang amo ug sa buyers niini. Atol sa pagkadakop kaniya, nakuha kang Gallarde ang kapin sa tulo ka kilong gidudahang shabu nga mobalor og kapin sa P20 milyones.

Ang dinakpan nga si Gallarde nalakip sa regional drug watchlist sa kapolisan.

Hardcore killer

Sa pikas bahin, patay ang gipasanginlang “hardcore killer” ug tulisan sa lungsod sa Dumanjug human nakaengkwentro ang kapolisan sa maong lungsod atol sa buybust operation sa Barangay Lawaan sa maong lungsod. Giila ang suspek nga si Alvin Dinopol nagpuyo sa maong lugar nga gikonsiderar nga High Value Individual sa Dumanjug Police Station ug adunay kasong murder.

Matud ni Police Major Ardioleto Cabagnot hepe sa Dumanjug Police Station daghan na silang nadawat nga reklamo batok ni Dinopol sama sa pagpatay, pagpanulis ug pagpabuto sa armas apan way makaako pagkiha. Giingong daghan ang nahadlok ni Dinopol kay napriso na kini sa kasong murder ug bag-ohay lang nakagawas sa prisohan.

Nakadawat sab og report ang kapolisan sa pagpanulis ug ang gitumbok nga suspek adunay tattoo nga sama sa kang Dinopol.

Dihang nakatrabaho kini og construction site duna kini nakailang security guard nga taga Dakbayan sa Talisay kinsa konektado sa negosyo sa ilegal nga drugas ug maoy nagtukmod niini aron pagpamaligya sab og illegal nga drugas. Atol sa hitabo, giingong laing tawo ang gisugo ni Dinopol pakigatubang sa poseur buyer diha sa Barangay Lawaan. Apan giingong nakabantay ang grupo nga polis ilang kasabot hinungdan nga nigawas gikan sa kalibonan si Dinopol ug gipabuthan ang mga polis hinungdan sa sinukliay og bala ug gikamatay sa suspek.

Atol sa kaguliyang, nakaikyas ang mga kakunsabo ni Dinopol dala ang ilegal nga drugas.

Lola nadakpan

Sa pikas bahin, usa ka 54-anyos nga lola ang nadakpan sa CIB-CCPO pinangulohan ni Police Major Randy Caballes diha sa Sitio Lower Kawayan, Barangay Sambag 2, Syudad sa Sugbo.

Ang dinakpan mao si Rosario Morales Mindoro alyas  “Sario” nga nakuhaan og 135 gramo nga gidudahang shabu nga mobalor dul-an P1 milyon.

Samtang ang kapolisan sa Dakbayan  sa Mandaue  ug Dakbayan   sa Lapu-Lapu sa gihimo sab nga managlahing buy bust operation nakasakmit og dul-an P500 mil nga gidudahang shabu ug pagkadakop sa upat ka mga suspek. Sa Mandaue City, nadakpan sila si Hennie Saruda, 37, nga nakuhaan usab og armas nga kalibre 45  nga pistola nga adunay unom ka mga  bala. Lakip  sa nasikop sila  si Jayson Almario, 20, ug Neil Igpuara, 27.

Sa Lapu-Lapu  City, nasikop Anecito Dela Torre Jr.,  37, pinasikad sa search warrant human nakuhaan og 12 gramo nga gidudahang shabu. Sheriza Mae Uy ug Romeo  T.   Limpangog/IBM (BANAT NEWS)