50 ka resorts owner boluntaryong mopaguba sa ilegal nga estraktura

CEBU, Philippines — Nikabat sa 50 ka tag-iya sa hotel, resort ug restaurant ang niuyon nga boluntaryo nilang gub-on ang ilang mga estraktura nga nasulod  sa “20-meter easement zone".

Ang maong lakang himuon kon mapasar na ang ordinansa pag-reclassify sa tulo ka barangay nga urban area.

Atol sa tigom tali ni Gobernador Gwendolyn Garcia,  opisyales sa munisipyo ug mga stakeholders gipasabot ngadto sa hospitality industry operators nga nakalapas  sila sa 20-meter easement zone tungod sa mga estraktura niini nga ilegal nga gitukod diha sa mga baybayon sa Barangay Saavedra, Basdiot ug Tuble. Ug kon ma-reclassify na gikan sa agriculture ngadto sa urban area mamahimo gihapong makapadayon ang operasyon sa 85 ka resorts ug hotel sa lugar apan mas gamay na lang ang estraktura.

Nasayran nga upat ka estraktura ang  apektado sa Barangay Tuble ug Saavedra ug 56 sa Barangay Basdiot.

Sa laing bahin, ang mga kapitan mahimong mangayo og tabang sa gobiyerno alang sa mga clearing operation sa karsada.

Si Konsehal Franklyn Ong, presidente sa Association of Barangay Council nagkanayon nga ang mga balay o establisemento nga nilapas sa mga karsada usa sa labing dako nga problema sa maong kamandoan ilabi na sa mga lugar nga adunay mga informal settler o subdivision.

Si Attorney Ian Lucero, hepe sa DILG-7 Local Government Monitoring and Evaluation Division nagkanayon nga ang kapitan pwedeng mangayo og tabang sa City Legal Office sa maong sitwasyon.

Ang mga kapitan giawhag kini nga moduso og reports ngadto sa central office sa DILG kalabot sa aksiyon nga ilang nahimo aron masuta nga nituman kini sa kamandoan.

Ang mga opisyal gihatagan kini og 75 ka adlaw sa pag-implementar sa clearing operation. ug Alicia Ivy L. Chua/BDB (BANATNEWS)