Comelec: Parehistro namo

CEBU, Philippines — Gihangyo sa Commission on Elections ang katawhan nga magparehistro na ug dili huwaton nag katapusang adlaw aron malikayan ang kakulian.

Matud ni Cebu City North District Election Officer, Atty. Marchel Sarno, nga sa nagpadayon nga voter’s registration ilang nakita nga dili kaayo daghan ang nagparehistro.

Gani mo-average lang sila og 120 ka tawo matag adlaw ug mogamay pa gyud sa adlaw’ng Sabado.

Bukas ang Comelec sa adlaw’ng Sabado aron gyud pag-akomodar sa mga gustong magparehistro.

Ang voter’s registration subay kini sa pagpangandam sa National ug Local Elections sa May 2022.

Gumikan niini, si Sarno niasoy nga kinahanglan gyud sila mohimo og satellite registration aron daghan ang marehistro.

“Magpaabot ta og request sa mga barangay kay without cooperation sa barangay kay per experience dili sad successful atong registration. Ang satellite registration especially sa mga bukid nga barangay importante kaayo kay instead mobayad sila og ginatos para lang pag-anhi sa atong opisina we are bringing our office at their door step,” matud ni Sarno.

Nagsugod ang registration niadtong Enero 20 ug mahuman kini sa Septiyembre 30, 2021 diin usa ka tuig ug walo ka buwan ang gidugayon.  GMR (BANATNEWS)