P2 milyones shabu nasakmit

CEBU, Philippines — Kapin sa P1.8 milyones nga balor sa shabu ang nasakmit atol sa buy-bust operation sa Drug Enforcement Unit sa Pardo Police Station 7 alas 6:00 kagabii sa Sitio Tabok Kanal, Poblacion Pardo,  Siyudad sa Sugbo.

Ang dinakpan mao Jemare Lopez Anjao, 42, taga Sitio Toong, Barangay Basak San Nicholas, Siyudad sa Sugbo.

Ang dinakpan gibalhug na sa Pardo Police Station aron pasakaan og kaso.

Samtang nadakpan atol sa buy-bust operation sa DEU sa Carbo Police Station ang durugista nga taga Dakbayan sa Dumaguete, Negros Oriental alas 11 pasado niadtong Huwebes sa gabii sa dalan Magallanes, Barangay Ermita, Siyudad sa Sugbo.

Ang operasyon gipangulohan ni Police Captain Alvin LLamedo nga niresulta sa pagkasikop ni Edwin Besario Pinili, 29, taga Barangay Taclobo, Dumaguete City ug kasamtangan nga nagpuyo sa Barangay Ermita.

Nakuha sa dinakpan ang 56 gramos sa gidudahang shabu nga mobalor og P374,000.

Ang dinakpan kasamtangang gitanggong sa Carbon Police Station 5 ug pasakaan og tukmang kaso.

Gitanggong sab sa detention cell sa kapolisan sa Presinto 1 sa Mandaue City Police Office ang pusher og shabu sa Sitio Tribunal, Barangay Centro, Dakbayan sa Mandaue.

Ang suspek nga si Francis Antigua Ylanan, 25-anyos, nagpuyo sa maong lugar, nadakpan sa buy-bust operation alas 8 pasado sa niaging gabii.

Matud ni Police Staff Sergeant Jayson Flores nga nakadawat sila og taho gikan sa mga molupyo sa maong lugar labot sa nagpadayon nga ilegal nga kalihukan sa dinakpan nga nakaaghat sa hepe sa Presinto nga si Police Major Ramil Morpos sa pagpaniid sa maong lugar.

Dugang pa ni Flores nga dihang nasuta nga tinuod ang ilang nadawat nga taho gikan sa mga molupyo dali usab nga gihimo ang buy-bust operation nga gipangulohan mismo ni Morpos.

Si Flores niingon nga ang ilang poseur buyer nigamit og P300 nga marked money sa pagpalit og shabu bugti sa usa ka pakite nga gihatag sa suspek nga niresulta usab sa iyang pagkasikop.

Sa pagrekisa nga gihimo sa kapolisan sa maong dinakpan maoy nakuha ang dugang pa nga mga pakete sa shabu. Romeo T. Limpangog/GMR (BANATNEWS)