Mga pinoy gi-quarantine, mga Chinese gipapauli

CEBU, Philippines — Dili momenus 89 ka mga Pilipino ang nangabot sa Sugbo gikan sa China lakip na sa Macau ug Hong Kong ang gipaubos na karon sa mandatory quarantine sulod sa 14 ka adlaw.

Ang 79 niini nangabot niadtong Domingo (Enero 2, 2020) gikan ni sa 200 ka pasahero sa tulo ka flights nga niabot sa Mactan Cebu International Airport (MCIA).

Ang maong mga Pilipino gipaubos sa home quarantine , apan kadtong kapin 100 ka mga langyaw sama sa mga Chinese nga gikan sa China gipabalik sa point of origin tungod sa gipatumang temporary travel ban sa tanang mga langyaw nga gikan sa nahisgotang mga nasod.

Ang 10 ka laing pasaherong Pilipino sakay sa Cathay Pacific flight gikan sa Hong Kong nga nangabot kagahapon sa buntag.

Matud ni Dr. Terrence Anthony Bermejo ang hepe sa Bureau of Quarantine sa Central Visayas miingon nga duna silay mga protocols nga gipatuman. Ang unom nga taga Sugbo maoy gipaubos sa home quarantine samtang ang upat nga dili taga Sugbo i-quarantine sa giilang quarantine facility sa DOH-7.

Protocol

Ubos sa protocol, si Dr. Jaime Bernadas ang regional director sa DOH-7 nagkanayon nga kadtong ipaubos sa mandatory home quarantine, kinahanglan kanunay nga magsul-ob og facemask; lahi ang ilang gamiton nga utensils sa ilang kauban sa balay; ug dili makagawas sa ilang panimalay sulod sa 14 ka adlaw.

Ang ilang pamilya motabang kanila pag-monitor ug aduna usab local health personnel nga kanunay mosusi o momonitor kanila.

Si Bernadas nitug-an usab nga moabot na sa 15 ka tao sa Central Visayas ang gikonsiderar nga patients under investigation (PUI). Ang 11 niini sa Cebu, usa sa Bohol ug tulo sa Negros Oriental.

"Wala nay labot katong gipang discharge. They are now at the facility sa Department of Health (DOH)," matud ni Bernadas.

Matud ni Bernadas nga ang maong mga indibidwal naapil kini sa "contact tracing" nga gihimo sa DOH. Sila kadtong mga tawong posible nga naduol sa duha ka Chinese nationals nga napositibo sa maong virus.

MCIA naghigpit na

Ang MCIA nideklarar kini og state if emergency tungod sa outbreak sa NCoV. Si MCIA General Manager Steve Dicdican miluwat sa maong memorandum circular pinasikad sa police power.

Atol sa press conference kagahapon, si Dicdican nagkanayon nga mamahimo nilang ma takeover ang bisan unsa nga pasilidad kun kinahanglan ug makahimo usab sila og emergency procurement sama sa mga ekipo nga gamiton batok sa NCoV.

 “For the Cathay Pacific passenger they did not need to disembark as the plane was going back but for Cebu Pacific they had to be disembark and placed in a holding area while the return was being arranged,” asoy ni Dicdican.

Duna nay giandam nga pasilidad para sa mangabot nga pasahero gikan sa China ug kun asa sila dad-on hasta ang lugar diin hatagan og instructions ang ilang pamilya kun unsay buhaton sa quarantine period.

Bisan og paigo pa ang pasilidad sa tugpahanan karon, nabalaka si Dicdican nga kuwangon kini tungod kay nagtuo siyang mas modaghan pa ang kinahanglang i-quarantine sa mosunod nga mga adlaw mao nga magpatabang sila sa Office of the Civil Defense, Local Government Unit ug Department of Social Welfare and Development kun asa sila ibutang.

300 Flights

Samtang anaa sa di mominus sa 300 ka mga flights ang giingong maapektahan sa temporary travel ban. Gani daghan nang Chinese airline flights ang nagkanselar og mga flights paingon diri sa Sugbo.

Apan aduna pay duha ka airlines sama sa Cathay Pacific ug China Eastern Airline nga padayon pa gihapon sa pagbiyahe paingon sa MCIA kay dunay daghang mga Pilipinong pasahero nga gustong makauli sa nasud gikan didto sa China.

Si Michael Lenane, Chief Operating Officer sa GMR Megawide Cebu Airport Corporation miingon nga nangandam na sila kun unsaon pagatiman ang mangabot nga mga pasahero gikan sa China.

Ang gate 17 sa terminal  magsilbing holding area diin kadtong mga pasahero nga gikan sa China  pasakyon og bus ug dad-on holding area ug dili sila masagol sa ubang mga pasahero.

 “When a flight arrives from China, those passengers that were disembarking would be put on a bus and brought directly to this holding area. So there is no interaction in the terminal for those passengers that are arriving from China and from the administrative areas of China,” ni Lenane pa. Ang Probinsya sa Sugbo, ang hunta probinsyal nideklarar usab og "state of preparedness" tungod sa maong sakit.

Contact Tracing

Andam nga motabang ang Police Regional Office 7 sa Department of Health pagpangita niadtong mga tawong posibleng nakatupad o nakadungan sa duh aka Chinese nationals nga nagpositibo sa novel corona virus nga mibisita sa Sugbo ug sa dakbayan sa Dumaguete sa Negros Oriental.

Si PRO7 Regional Director Police Brigadier General Valeriano De Leon mibutyag nga dunay direktiba gikan sa ilang labaw nga tabangan ang maong ahensya.

Mahimo usab nga sila ang mohatod sa maong mga tawo gikan sa ilang panimalay paingun sa tambalanan aron magpahiling. IBM (BANATNEWS)