Labing tiguwang sa Sugbo 106-anyos na
CEBU, Philippines – Nagsaulog sa iyang ika-106 ka tuig nga sumad sa adlawng natawhan ang gikonsiderar nga labing tiguwang nga tawo sa tibuok Lalawigan sa Sugbo niadtong Lunes sa gabii.
Si Juana Lumaad Roble, taga Sabang, Danao City giubanan sa iyang mga anak, mga apo ug ubang sakop sa pamilya sa panihapon alang sa kasaulogan.
Ang 64-anyos nga anak nga si Dr. Nerita Roble Alonzo nibutyag nga ang iyang inahan nakadawat na og P250,000 niadtong 2016 gika sa kagamhanan sa Dakbayan sa Danao, P100,000; nasudnong kagamhanan, (P100,000) ug P50,000 sa Kapitlolyo isip gasa sa makaabot og edad nga 100.
“Para namo considered siya as a champion of life kay siya may the highest, considering the oldest person sa whole Province of Cebu,” matud sa apo nga si kanhi Hilongos, Leyte mayor Jose Emery “Joy” Roble ug tag-iya sa Roble Shipping Lines.
Si Juana natawo niadtong Enero 27, 1914 sa Inopacan, Leyte. Naminyo siya sa Sugbo kang Jose Roble Sr. ug namuyo sa Dakbayan sa Danao diin sila dunay 11 ka anak. Si Jose namatay sa edad nga 93-anyos.
“Una, mainampoon, ikaduha kontrol sa pagkaon, amping sa pagkaon kanunay, ang iyang isda paborito tamarong ra gyud wa nay lain,” tubag ni Joy sa pangutana sa sekreto sa iyang lola.
Matud ni Alonzo nga sa dili matulog ang iyang inahan sa gabii, mag-rosaryo una kini.
“I wish her more years, inspite ako ray nag-atiman, gusto pa gyud nako ma-prolong ang iya life,” matud ni Alonzo kinsa nagtrabaho sa Danao City Health Office.
Tin-aw pa ang pangdungog ni Juana ug abtik pa nga motubag sa iyang pangan ug petsa sa natawhan samtang niagik-ik dihang gisukna kung gusto pa ba niyang moabot og kapin sa 110 anyos. (BANAT NEWS)
- Latest
