75 nalambigit sa ilegal nga sugal sikop

CEBU, Philippines — Nikabat ngadto sa 75 ka tawo kinsa giingong mga nalambigit sa ilegal nga sugal ang   nadakpan sa gipahigayong lapad nga operasyon batok sa ilegal nga sugal sa Cebu City Police Office (CCPO) ug Criminal Investigation and Detection Group (CIDG)-7 sa Dakbayan sa Sugbo.

Ang nahisgutang duha ka unit sa kapolisan padayon kining subsob sa ilang operasyon batok sa ilegal nga sugal.

Base sa talaan sa kapolisan gikan sa Enero 23 ngadto 24, 2020 nikabat sa 53 ka operasyon ang ilang gipahigayon batok sa ilegal nga sugal ug 70 ka tawo ang nasikop.

Matud ni Police Lieutenant Colonel Clark Arriola, tigpamaba sa CCPO nga subling gipatutokan sa kadagkoan sa kapolisan ang ilegal nga sugal ilabi na ang ilegal nga swertres.

Gibutyag ni Arriola nga ang mga area sa Labangon Police Station, Talamban Police Station ug Pardo Police Station maoy giingong kasagaran daghan ang nalambigit sa ilegal nga sugal tungod sa mga bukirang bahin niini.

Ang direktor sa CCPO Police Colonel Engelbert Soriano nimando kini sa pagpuhag sa tanang ilegal nga pasugalan sa Dakbayan sa Sugbo.

Sukad sa paglingkod ni Soriano sa pwesto subsob usab ang ilang operasyon batok sa ilegal nga sugal.

Samtang si Police Major Roland Allam Tolosa, deputy regional chief sa CIDG nibutyag nga ang “Peryahan ng Bayan” mao lang ang gitugotan sa Philippine Charity Sweepstakes Office (PCSO) sa Dakbayan sa Sugbo.

Dugang pa ni Tolosa nga sagad nga ilang madakpan mao ang mga barangay nga nahimutang sa mga bukirang bahin sa dakbayan sa Sugbo tungod ky nagtuo nga dili na kini maabot sa kapolisan.  BDB (BANATNEWS)