Salimbangon, Ouano-Dizon nagbutang og P15 milyones sa VSMMC, Eversley

CEBU, Philippines — Nigahin og P15 milyones ang duha ka babayeng kongresista sa Lalawigan sa Sugbo alang sa Vicente Sotto Memorial Medical Center sa Dakbayan sa Sugbo ug Eversley Childs and Sanitarium and General Hospital sa Dakbayan sa Mandaue.

Sila si Kongresista Emmarie «Lolypop» Ouano-Dizon sa ikaunom nga distrito ug Kong. Janice Salimbangon sa ikaupat nga distrito nakigpirmahay og memorandum of agreement tali nilang VSMMC Chief of Hospital Gerardo Aquino, ECSGH Chief of Hospital Phythagoras Zerna ug Department of Health-7 Director Jaime Bernadas.

Si Ouano-Dizon nigahin og P7.5 milyones sa VSMMC ug P3.5 milyones ECSGH samtang si Salimbangon nigahin og P4 milyones sa VSMCC ug P1 ka milyon sa ECSGH.

Ang pundo gamiton kini sa mga kabus nga pasyente nga malandig sa tambalanan.

Ang bana ni Salimbangon nga si kanhi kongresista Benhur Salimbangon dunay gipasiugdahan nga Benhur Health Card sukad pa niadtong 2010.

“Ang nasugdan ni Benhur akoa ra gyud ning gipadayon. Kay nakita pud gyud nako nga maayo ni nga programa unya daghan na gyud ni og natabangan labi na sa mga kabus namo nga mga constituents,” matud ni Janice.

Subay usab kini sa Medical Assistance for Indigent Patients Program sa DOH.

Samtang gihangop sa mga kabus nga senior citizen ug mga person with disabilities sa Dakbayan sa Mandaue ang gihimo ni Ouano-Dizon.

Nisaksi sa pagpirmahay sa MOA sila si Consolacion Mayor Joannes “Joyjoy” Alegado, Cordova Mayor Mary Therese “Teche” Sitoy-Cho; Konsehal Nerrissa Soon-Ruiz, chairman sa committee on health sa konseho sa Dakbayan sa Mandaue ug Konsehal Aurelio Damole, chairman sa committee on health sa konseho sa Lungsod sa Consolacion.

Si Aquino sa iyang pamahayag niingon nga daku kaayo ang ilang kahinangop sa maong gahin nga ubos sa medical assistance program sa duha ka kongresista tungod kay daku kini nga tabang alang sa panginahanglan sa mga kabus nga pasyente.

Si Ouano-Dizon sa iyang pamahayag niingon nga ang maong medical assistance program nga iyang gipasiugdahan mapahimuslan sa mga kabus nga pasyente sa Cordova, Consolacion ug Dakbayan sa Mandaue nga pinaagi usab sa certification gikan sa buhatan sa Department of Social Welfare and Development 7. – Gregg M. Rubio ug Romeo T. Limpangog/GMR

Dugang computers sa E-Library sa Lapu-Lapu

Mas daghan pa sa mga kabus nga tinun-an sa nagkadaiyang publikong tunghaan sa Dakbayan sa Lapu-Lapu ang makapahimulos sa paggamit og mga computer alang sa ilang mga research sulod sa E-Library nga nahimutang sa Hoopsdome. Ang naangkon nga dugang 20 ka computers nga gipahimutang ni Mayor Junard “Ahong” Chan sa E-Library ang kompleto gihapon sa mga kagamitan.

Ang grupo sa mga Filipino-Chinese nga magpapatigayon sa dakbayan maoy naghatag og dugang 20 ka personal computers ngadto sa kagamhanan nga adunay free Wi-Fi connection, printers ug uban pa.

Tuyo niini ang pagtabang sa gipatuman nga Libreng Serbisyo nga dili lamang sa pag-atiman sa panglawas kun dili lakip na usab ang pagtungha sa kabataan sa dakbayan.

Hinoon gitugot usab ang pagdala sa mga tinun-an sa ilang kaugalingong laptops, tablets, o bisan ang ilang mobile phone sa lounge area sa E-Library alang sa paggamit sa Wi-Fi niini.

Gipaneguro ni Chan nga dili ka abusohan ang paggamit sa mga tinun-an pinaagi sa paghatag lang kanila og duha ka oras nga paggamit sa ingon ang uban nga mga tinun-an ang makabanos usab sa paggamit.

Giseguro usab sa mayor ang kaluwasan sa mga tinun-an sanglit ang E–Library sa dakbayan anaa man nahimutang atbang usab sa buhatan sa kapolisan sa Presinto 3 sa Lapu-Lapu City Police Office. /GMR (BANATNEWS)