‘Cash for work’ napahimuslan sa taga Lapu-Lapu

CEBU, Philippines — Nakapahimulos ang mga kabus nga molupyo sa kabarangayan sa Dakbayan sa Lapu-Lapu nga walay trabaho sa gipasiugdahan nga cash for work program sa Department of Labor and Employment uban usab sa buhatan ni Kongresista Paz Radaza.

Si Radaza niingon nga ilang gibahig sa tulo ka hugna nga makapahimulos ang mga molupyo sa kabarangayan.Gitataw ni Radaza nga ang makapahimulos sa maong programa nga mga Oponganon ang makadawat og sweldo nga minimum nga molungtad usab og napulo ka adlaw nga pagtrabaho.

Nag-una nga makapahimulos sa maong programa nga gipasiugdahan sa DOLE ug buhatan ni Radaza mao ang napulo ka adlaw nga pagtrabaho nga mga kabus nga molupyo sa dakbayan ubos sa Tulong Panghanapbuhay sa Ating Disadvantaged/Displaced (TUPAD) Workers sa Dakbayan sa Lapu-Lapu.

Si Radaza niingon nga sa 5,000 ka kabus nga maoy beneficiaries sa TUPAD Program maoy nakadawat ang unang hugna nga 2,000 ka mga Oponganon.

“Ang budget ani gikan sa national, deretso gyud na sa panudlanan sa DOLE ug ang mga benepisyari sa maong programa mao na ang mokobra,” matud ni Radaza.

Nunot niini iyang giawhag ang mga barangay kapitan sa 30 ka barangay sa dakbayan nga naglakip na sa 11 ka barangay sa Isla sa Olango sa paghimo og higpit nga pag-monitor sa pagseguro nga ang mga kabus nga beneficiaries ang makapahimulos niini. /GMR (BANATNEWS)