Magtukod og building way permit multahan

CEBU, Philippines — Girekomendar sa City Legal Office ngadto sa konseho sa Siyudad sa Sugbo ang resolusyon sa Cebu City Zoning Board sa pagpahamtang sa multa nga P500 matag metro kwadrado sa kinatibuk-an nga lugar sa mga building tukuron nga wala’y permit.

Si Attorney Rey Gealon, city legal officer, nagkanayon nga ang resolusyon sa CCZB nagtumong sa pagpahamtang sa multa human namatikdi nga dunay pagkaylap sa mga non-compliant building construction labi na kadtong wala’y mga permiso sa pagtukod sa siyudad.

“The CLO anchored its recommendation on the power of the city under the Local Government Code to require ancillary permits and impose corresponding fees, charges and penalties,” matud ni Gealon.

Subay sa ordinansa sa siyudad numero 1656, ang CCZB adunay gahum sa pagpahamtang og silot ingon man multa sa maong mga kalapasan.

Niadtong Nobiyembre 2019 gitugyan sa CLO ang awtoridad sa CCZB aron ipahamtang ang mga multa sa mga paglapas sa National Building Code.

Ang CCZB nangayo sa legal nga opinyon sa CLO bahin sa hangyo sa usa ka tag-iya sa pribadong building nga wagtangon ang mga silot batok kaniya tungod sa kapakyas sa pagkuha sa mga kinahanglanon nga permiso sa wala pa magsugod ang pagtukod sa iyang building.

Nahibaw-an sa CCZB sa pag-inspeksyon nga 70 porsyento na ang nakompleto sa pagtukod apan walay permit diin naglapas sa ordinansa sa siyudad ug sa National Building Code.

Ang tag-iya sa building gikinahanglan nga mobayad gyud sa multa nga gipahamtang batok kaniya. /GMR (BANATNEWS)