‘Oplan Sidlak’ gilusad sa kapolisan sa Talisay

CEBU, Philippines — Nagtuo ang hepe sa kapolisan sa Dakbayan sa Talisay nga ang pagpakigbatok sa ginadiling drugas dili lang pulos operasyon sa mga tawo nga nalambigit niini.

Apan daku sab og tabang ang pagtudlo o pag-edukar sa katawhan kung unsa ang epekto sa ginadiling drugas sa pagkatawo.

Si Police Major Gerard Ace Pelare nibutyag nga wala nila giwagtang ang ilang mga operasyon o paggukod sa mga tawo nga ilegalista.

Apan ang ilang gidugang mao ang pagsuroy sa nagkalain-laing barangay ingon man sa matag tunghaan aron makuha ang simpatiya sa katawhan ug makatabang nga mapalayo sila sa ilegal nga drugas.

Ang Talisay City Police Station nilusad sa ilang “Oplan Sidlak” diin mosuroy sila sa matag tunghaan aron pasabton ang kabataan nga walay maayo nga resulta ang tawo nga nabuang sa ginadiling drugas.

Si Pelare nipili sa kabataan tungod kay sila maoy paglaum sa umaabot nga adlaw. Ang kabataan sab ang dali nga mabiktima niining drugas nga naa sa nagkalain-laing dapit.

Si Presidente Rodrigo Duterte subli nga nihingan sa Dakbayan sa Talisay nga naay daghang drugas.

Apan sa niaging semana niabot na sa kapin 100 ka indibidwal ang nadakpan gumikan sa kalapasan may labot sa ilegal nga drugas. /GMR (BANATNEWS)