Duha ka sunog, duha patay

CEBU, Philippines — Usa ka bana ang gisikop sa kapolisan nunot sa kamatayon sa asawa niini ug pagkaugdaw sa ilang panimalay kagahapon sa buntag didto sa Sitio San Roque sa Barangay Liburon sa Dakbayan sa Carcar.

Samtang laing sunog usab ang miulbo sa Sitio Panagdait, Barangay Kasambagan sa Dakbayan sa Sugbo nga miresulta kamatayon sa usa ka lalaking gituohang may kakulian sa pangisip.

Sa Dakbayan sa Carcar, niulbo ang sunog alas 12 sa udto apan sa pagabot sa kabomberohan naugdaw na ang balay ug napawong dayon kini. Sa pagsusi sa mga bomber sa sud, nakita ang patay’ng lawas sa babaye.

Nagtuo lang ang mga bombero nga namatay sa maong sunog ang babaye nga giilang si Dailyn Melecio, 24.

Wala diha ang bana niini nga si Romnick Melecio,39, ug ang ilang lima ka buwang anak.

Matud pa ni Police Corporal Argel Noel Espinosa, Desk Officer on-duty sa Carcar City Police Station, dunay testigo nga ang magtiayong Melecio nagaway pipila ka oras sa wala pa mahitabo ang sunog.

“Kani daw sila, ang suspek ug ang biktima, naa daw ni silay heated argument, commotion,” sumala pang Espinosa sa Banat News.

Sa gihimong paghiling sa SOCO, dunay nakuha ang mga imbestigador nga usa ka pito ka pulgadang kutsilyo nga gituohang maoy gigamit sa pagpatay sa biktima.

Tungod niini, nihimo og follow up operation ang mga sakop sa Carcar Police Station ug niresulta sa pagkasikop sa bana ni Dailyn nga si Romnick.

Si Espinosa miingong nga dili nila ikasalikway ang posibilidad nga gituyo sa bana pagsunog ang balay aron taguon ang iyang pagpatay sa asawa ug gidala sab niini ang ilang lima ka buwang anak.

Sa pagkakaron, padayon ang kapolisan sa ilang imbestigasyon, samtang ang kabomberohan mibanabana sa danyos nga moabot og P75 mil samtang padayon pang gitino kun unsay gigamit sa suspek pagsunog sa balay niini.

Kasambagan

Samtang dul-an sa 25 ka mga panimalay ang naigo sa pag-ulbo sa sunog sa may Sitio Panagdait, Barangay Kasambagan Dakbayan sa Sugbo kagahapon sa hapon.

Nadawat sa kabomberohan ang alarma alas 3:15 sa hapon ug napawong kini kapin usa ka oras nga kombate. Ang sunog giingong nagsugod sa panimalay ni Guillermo Canabe Sr.

Usa ka Guillermo “JongJong” Canabe Jr., nga anak sa tagiya sa balay nga diin giingong nagsugod ang sunog, gidakop sa kapulisan human giingong maoy nagsunog sa ilang balay.

Si Fire Officer 2, Emerson Arceo, ang ground commander sa mirespondeng mga bombero miingon nga ilang gisusi ang arson nga anggulo.

“Kini siya, tinuyo ni siya. Naa na sa kustodiya sa Mabolo Police Station ang suspek,” matud pang Arceo. Matud niya giduslitan sa suspek ang butane stove nga gipatongan og mga hanger sa sinina.

Sa pakighinabi sa mga tigbalita kang Canabe Jr. miangkon kini nga nakasuyop kini. “Murag giniyerbiyos ko ,unya nisuyop sad ko. Nagluto ko sa butane dayon akong gibyaan. Natuyo sad nako,” matud niini.

Sumala pa niya nga nabuhat niya kini tungod kay estambay siya ug walay trabaho ug gipasanginlan siya sa mga silingan nga “asset” ug usa kini sa hinungdan sa iyang kalagot nila maong nabuhat niya ang krimen.

Giangkon sab niya nga bag-ohay lang siyang nakagawas sa prisohan tungod gihapon sa kaso sa illegal nga drugas. Nangayo hinuon siya og pasaylo sa mga silingan sa iyang nabuhat.

Napaig

Sa gihimong imbentaryo sa kabomberohan dunay nakitang patay nga lalaki nga napaig sud sa usa ka lawak nga dunay mga rehas ug gigaid kini.

Ang maong lalaki giila nga si Leo Armamento nga gituohan sa kapolisan nga dunay kakulian sa pangisip mao nga gitanggong sa maong lawak sa iyang pamilya.

“Murag gitagkos ni siya kay naa ni siyay gamay’ng deperensya sa pangisip,”  matud pang Arceo.

Ang sunog nakontrolar alas-5 pasado na sa gabii ug hingpit napawong paglabay sa usa ka oras.

Gibana-bana nga mokabat dul-an sa tunga sa milyon ka pesos ang danyos sa maong sunog.

Sa pikas bahin, niulbo sab ang sunog kagahapon sa kaadlawon sa Lemon Street, Rama Compound Cebu City  nga nagsugod sa balay sa usa ka Antonio Madarang.

Ang maong balay giingong gigamit na isip bodega sa nagabang kinsa wala pa mailhi sa kabomberohan atoll ning pagsuwat sa balita.

Si Fire Officer Fulbert Navarro sa Cebu City Fire Station niiingon nga wala pa nila matino ang hinungdan sa sunog apan usa sa ilang gitan-aw nga faulty electrical wirings o dunay tuyong nagsunog niini tungod kay pirmeng way tawo ang maong balay. Rowena Capistrano ug Romeo Marantal/IBM (BANATNEWS)