Wa magkasinabot sa presyo, lalaki gibugno sa “boring”

CEBU, Philippines — Usa ka babayeng giingong nagbaligya sa iyang dungog gipaslak sa prisohan human gireklamo sa iyang kustomer nga iyang gibugno kini sulod sa lawak sa lodging house sa dalan Manalili Barangay Santo Niño sa Dakbayan sa Sugbo.

Matud ni Police Major Jomar Pomarejos hepe sa Waterfront Police Station midangop sa ilang buhatan ang usa ka lalaki ug nisumbong nga gibugno kini sa iyang giabangan nga babaye human wala sila magkasinabot sa bayad sa ilang lawasnon nga kalipay.

Dugang pa ni Pomarejos nga ang lalaki mitug-an nga giduol kini sa maong babaye ug gihaylo og lawasnong kalipay bugti sa P500.  Sa dihang nagkauyon sa presyo ang duha mipalit dayon og condom ang lalaki ug nag-check in sulod sa lodge.

Sa dihang paingon na unta sila magsawo sa ibabaw sa kama giingong gipatas-an sa babaye ngadto sa usa ka libo ka pesos ang bayad apan wa mosugot  ang lalaki ug gibawi ang P500.

Dihadiha giingong gilayog ug gibugno kini sa maong babaye hinungdan sa naangkon niining mga samad sa nawong nga gikinahanglang tahion sa tambalanan. Nasayran nga gawas sa P500, mihatag usab ang reklamante og P300 sa bugaw, laing P500 alang sa bayad sa kwarto, ingon man P100 alang sa pagpalit og condom.

Ang maong babaye daling gidakop sa kapolisan ug pasakaan og kasong Physical Injury ugmang adlawa. /IBM (BANATNEWS)