Magsisibya gidakop sa 80 ka kasong libel
CEBU, Philippines — Gidakop ang usa ka magsisibya nunot sa 80 ka kasong libel sa Lungsod sa Mabinay, Probinsiya sa Negros Oriental.
Giila ang dinakpan nga si Raffy “Carlo” Ruiz, 33, taga Barangay Poblacion, Lungsod sa Mabinay, ug usa ka magsisibya sa lokal nga radio station sa Negros Oriental.
Matud ni Police Captain Emmanuel Rabaya, company commander sa 704th Maneuver Company sa Regional Mobile Force Batallion, nga nakadawat sila og impormasyon kalabot sa nahimutangan ni Ruiz.
Dugang pa ni Rabaya nga si Ruiz gidakop pinasikad sa warrant of arrest nga giluwatan ni Judge Candelario Guillermo sa Regional Trial Court Branch 45 sa Dakbayan sa Bais, Negros Oriental.
Nasayran nga adunay 80 ka ihap sa kasong libel nga giatubang ang maong magsisibya human sa pagpangdaut niini sa iyang programa sa radyo ngadto sa mayor sa Mabinay.
Ikaduha na niya kini nga higayon nga nadakpan sa kapolisan ug una kini siya nga nadakpan niadtong nilabay nga tuig.
Piyansa nga P30 mil ang gipahamtang sa korte alang sa temporaryong kagawasan ni Ruiz. –/GMR (BANAT NEWS)
- Latest
