Imbestigasyon sa drugas sa Consolacion gipalawman

CEBU, Philippines – Gipalawman sa mga imbestigador sa kapolisan sa Lungsod sa Consolacion ang nasakmit nga shabu balor og P7 milyones.

Si Police Major Verniño Noserale, hepe sa Consolacion Police Station, niingon nga lakip karon sa ilang gisusi ang posibleng kalambigitan sa mga dinakpan sa dagkung sindikato sa shabu.

Gisubay karon ang managkapuyo nga ilang nadakpan sa Sitio Bangkerohan, Barangay Tayud sa maong lungsod nga giila nga sila si Joann Sanchez, 42, ug RJ Jazon Jerusalem, 28, taga Barangay Lorega, Dakbayan sa Sugbo sa kalambigitan sa Ygot drugs syndicate.

Sa maong operasyon lakip usab sa nadakpan sila si Jonaly Dinoy Bentazal, 27, taga Sitio Sun-ok, Ibabao, Cordova; Jennifer Narido Flore, 21; Baby Beldosola, 25, ug Helen Cuevas, 52, pulos taga Lorega, Dakbayan sa Sugbo.

Gitataw ni Noserale nga ang gidaghanon sa nakuha nilang shabu daw susama sa nakuha sa buy-bust operation niadtong Hulyo 23, 2019 sa Dakbayan sa Mandaue diin tulo ang namatay.

Sumala pa sa kapolisan nga ang Ygot group ang ilang giila nga usa ka notorious nga sindikato sa ilegal nga drugas sa Lungsod sa Consolacion.

Samtang unom ka tawo ang nasikop lakip ang pagpuhag sa drug den atol sa buy-bust operation sa mga tinugyanan sa Philippine Drug Enforcement Agency 7 sa may Block 7, Sitio Buaran, Sawang Calero, Dakbayan sa Sugbo niadtong Martes sa gabii.

Ang mga nasikop mao sila si Bernardo Vicente Son, 22, target sa buy-bust ug drug den maintainer; Remar Samarez, 32; Jenel Nicolas, 33; Wendel Fernandez, 27; Jeremy Solis, 42; ug Jimboy De Lima, 30, mga ningbisita sa drug den.

Nasakmit gikan sa mga dinakpan ang unom ka putos sa gituohang shabu nga balor og dul-an sa P75,000 ug kagamitan sa pagsuyop.

Matud pa ni Leia Acantara, tigpamaba sa PDEA-7, nga pipila na ka adlaw gi-monitor ang subject human nakadawat og taho may kalabutan sa kalihukan niini sa pagpayuhot sa ginadiling drugas ug pagmintenar sa drug den. /GMR (BANAT NEWS)