Ilegal nga sugal padayon nga gukdon sa kapolisan

CEBU, Philippines – Nikabat ngadto sa 16 ka nagkalainlaing matang sa sugal ang natala sa Cebu City Police Office (CCPO) sulod lang sa 12 ka oras nga operasyon nga gipahigayon sa Dakbayan sa Sugbo.

Kini maoy gibutyag sa direktor sa CCPO Police Colonel Engelbert Soriano subay sa gipahigayon nga intensify campaign against illegal gambling.

Matud ni Soriano nga sagad sa ilang nadakpan ang nalambigit sa ilegal nga swertres diin aduna silay natala nga 15 ka kaso niini ug usa ang bolitsi.

Gibutyag ni Soriano nga molusad usab sila og lapad nga operasyon batok sa ilegal nga sugal human nga aduna silay mga reklamo nga nadawat nga aduna gihapoy mga nagtagotago nga nagpahigayon sa ilegal nga sugal.

Subay niini, gihangyo ni Soriano ang publiko nga mo-report ngadto sa kapolisan kon adunay makit-an nga nagpahigayon og ilegal nga sugal diha sa ilang dapit.

Dugang ni Soriano nga padayon ang ilang pagpanakop sa mga nalambigit sa ilegal nga sugal. /BDB (BANAT NEWS)