Namahid og luwa atol sa Sinulog nailhang taga Danao

CEBU, Philippines — Makig-alayon ang Cebu City Police Office (CCPO) ngadto sa mga biktima nga napahiran og pintal nga adunay sagol nga luwa atol sa Sinulog nga nag viral karon  sa social media.

Si CCPO Director Police Colonel Engelbert Soriano miingon dako kaayo ang iyang pagkasagmuyo sa gibuhat sa maong lalaki nga nag-atang sa mga tawo nga nanan-aw sa Sinulog Grand Parade ug pagkahuman mamahid og pintal nga gisagolan niini og luwa.

Matud ni Soriano nga tungod sa maong video nahibaw-an nila ang gihimo sa maong lalaki kinsa nailhan dayon nga taga Dakbayan sa Danao.

Mipasalig si Soriano nga tabangan nila kadtong mga biktima nga napahiran sa luwa sa maong lalaki aron makasohan ang naulahi.

Gihulagway usab ni Soriano nga usa ka pagbinastos sa kapistahan ni Señor Santo Niño ang gihimu sa maong lalaki ug usa ka dakong insulto  sa mga Sugboanon.

"He did not only disrespect those persons na pininturahan nya with saliva but he also disrespected the solemnity of Sinulog 2020 it was very insulting not only directly affected but also to the people of Cebu City. I would be glad to see him in jail or he at least, minimum, do a public apology,"pasabot pang Soriano.

Gihangop ni Soriano ang gihimo karon sa Danao City Local Government pagpangita sa maong lalaki.

Dunay mga netizens nga nikomento sa video nga giluod sa gibuhat niini ug duna say nabalakang basin duna kini makatakod nga sakit ug gibutang niini sa peligro ang kinabuhi sa uban.

Sa pikas bahin, moabot 10 ka mangunguot ang nangadakpan sa kapolisan atol sa Sinulog.

Ang mga dinakpan matud pa gikan kini sa nagkalain laing bahin sa nasud nga tuyong mianhi sa Sugbo alang sa Sinulog aron mamiktima. Ang mga suspek nabawian og klase-klaseng mga cellphones. /IBM (BANATNEWS)