Paninda mo kutob sa mahimo basta dili illegal- Mayor Labella

CEBU, Philippines — Si Cebu City Mayor Edgardo Labella miklaro nga gitugotan ang tanang mga gustong maninda og mga pagkaon ug ilimnon diha sa Sinulog Grand Parade route basta nituman sila sa mga patakaran nga gipatuman sa siyudad.

Kini maoy giklaro sa mayor human nga usa local food processing company ang giingong mihangyo ni Labella human kini ug ang uban pang mga kompanya gikataho nga gibabagan sa Sinulog Foundation Inc. (SFI) gikan sa pagbaligya sa ilang mga produkto sa mga kalihokan nga adunay kalabotan sa Sinulog.

Si Labella miingon nga gitugotan sila sa ubos sa “principle of free enterprise.”

Matud ni Labella basta ang importante nga nagsunod ang maong mga vendors sa mga lagda sa Food and Drug Authority ug Department of Trade and Industry, ug mga regulasyon nga gimando sa siyudad.

Gitambagan na niya si Cebu City Police Office Director Pol. Col. Engelbert Soriano nga dili kumpiskahon ang bisan unsang baligya nga pagkaon, butang, o artikulo basta dili kini ilegal ug nagsunod sa mga kinahanglanon nga gihatag sa mga ahensya sa gobyerno.

“Local producers are very much allowed, especially the small and medium enterprises. We are encouraging them to engage in business,” ingon ni Labella.

Kahinumduman nga gikataho nga misulod ang SFI sa usa ka eksklusibo nga kasabutan uban ang San Miguel Foods Inc. (SMFI) aron maoy ekslusibong makabaligya og mga pagkaon ug ilimnon diha sa rota. Apan si Labella miingon nga ang kontrata tali sa SFI ug SMFI magpabilin, apan “dili kini magbugkos sa lungsod.”

Giangkon sa mayor nga wala niya makita ang kontrata tali sa SFI ug SMFI.

“I have nothing to do with that and I will never agree to any exclusivity contract,” matud ni Labella. /IBM (BANATNEWS)