Kapolisan nipahimangno sa katawhan aron dili mabiktima

CEBU, Philippines – Ang kapolisan niawhag sa katawhan nga likayan ang paggamit og cellphone o bisan unsa nga gadget samtang naglakaw o nagsakay sa Jeep aron dili kini malabnihan sa mga snatcher.

Likayan usab ang pagsul-ob og mga mahalon nga alahas diha sa publikong lugar ug bantayan ang ilang bag ug ubang mga gipangdala o personal nga mga butang. Giawhag usab sa kapolisan ang katawhan nga likayan ang pag-agi sa mga ngitngit nga eskinita ug dili makig-estorya sa mga tawo nga dili nila kaila.

Ang mga nanag-iya og sakyanan giawhag usab sa pag-lock niini nag-andar man o nag-parking.

Ang kapolisan nipahimangno usab sa katawhan nga dili magsige ug check-in sa facebook aron dili masayran sa mga badlongon sa katilingban nga walay tawo ang panimalay.

Ang kapolisan niawhag sa katawhan nga kong aduna silay mga kabalaka ug pangutana dili magduha-duha sa pagduol sa kapolisan o mahimo ra sila nga motawag sa hotline numbers 09063903402 o 09196587668.

Ang direktor sa Cebu City Police Office (CCPO) Police Colonel Engelbert Soriano nagkanayon nga 100 porsyento silang andam ug aduna sila’y ipakatap nga mga polis diha sa mga nagkadaiyang kadalanan sa dakbayan.

Giawhag usab ni Soriano ang katawhan nga mohatag usab sa ilang kooperasyon ngadto sa kapolisan aron magmalampuson ug malinawon ang kalihukan. /BDB (BANAT NEWS)