Way day-off ang traffic enforcers sa Talisay sa Domingo
CEBU, Philippines – Kanselado ang day-off ingon man leave sa mga sakop sa City of Talisay-Traffic Operation Development Authority (CT-TODA) karong Dominggo atol sa kapistahan ni Senyor Santo Niño.
Kini maoy silbing tabang sa Dakbayan sa Talisay sa paghapsay sa trapiko sa Siyudad sa Sugbo.
Matud ni Jonathan Tumulak, traffic czar sa dakbayan, nga iyang naobserbaran sa dihang nialagad pa siya sa Siyudad sa Sugbo nga matanggong ang mga sakyanan dapit sa Barangay Bulacao ingon man Tabunok hinungdan nga maghuot sab ang sakyanan sa Siyudad sa Sugbo.
Iyang gipasabot nga inter-connected ang traffic diin buot pasabot nga kun unsa ang problema sa usa mao sab ang problema sa silingan nga lugar.
Sigun ni Tumulak nga wala nihangyo ang Siyudad sa Sugbo apan iya lang kining kabubut-on aron makatabang. Ang Talisay agianan sa mga tawo nga mopaingon sa Siyudad sa Sugbo ingon man sa pagpamauli paingon sa habagatan.
“Lahi man gyud kaayo kung adunay enforcer nga naa makita sa mga motorista kay motahud naman sila. Busa ang dagan sa trapiko lahos-lahos ra og walay magpaugat,” nagkanayon si Tumulak.
Iya sab gihangyo kadtong mga barangay tanod sa mga lugar nga maagian padulong sa Siyudad sa Sugbo nga motabang sa maong adlaw. /GMR (BANAT NEWS)
- Latest
