Ex-PBA player gipriso

CEBU, Philippines – Usa ka propesyonal nga basketball player ang gidakop sa mga sakop sa Abellana Police Station human kini gireklamo sa iyang kanhi uyab og pagpangulata kagahapon sa hapon diha sa Barangay Santa Cruz sa Dakbayan sa Sugbo.

Giila ang gidakop mao si Eluid “Eloy” Poligrates, 32,  lumad nga taga Poro sa isla sa Camotes. Samtang ang mireklamo ug mipadakop kaniya mao ang 39 anyos niining kanhi hinigugma.

Matud ni Abellana Police Station chief Police Major Elisandro Quijano nga away sa yuta ang hinungdan sa panaglalis sa kanhi hinigugma ni Poligrates.

Dugang pa ni Quijano nga adunay yuta nga gibaligya si Poligrates sa iyang kanhi hinigugma niadtong uyab pa kini sila, apan sa dihang nagkabuwag ang duha  buot sa suspek kuhaon pagbalik ang yuta nga napalit sa biktima apan iyang ipaagi sa data-data.

Tungod kay buwag na ang duha wala na usab makigkita ang biktima ngadto kang Poligrates sud na sa pipila ka tuig.

Kagahapon sa hapon nagkaabot ang duha sa usa ka parking lot sa usa ka tindahan hinungdan nga gikompronta sa basketbolista ang biktima apan nahimong bayolente ang sunod nga hitabo. Gikatahong gisagpa ug gibira sa suspek ang buhok sa biktima hinungdan sa pagpangayo sa naulahi og tabang. Ang mga polis dali sab nga naabot sa dapit ug giaresto si Poligrates.

Ang six-footer nga si Poligrates naapil sa Round 3 PBA draft  niadtong 2013 ug ika-27th overall pick kini sa Talk ‘N Text Tropang Texters.  Nakaduwa na sab kini sa koponan sa Air21 Express, Kia ug NLEX Road Warriors ug karon anaa na magduwa sa PBA D-League. Siya sab ang napiling 2019 PBA D-League MVP ubos sa koponan nga Marinerong Pilipino.

 Kasong kalapasan sa Violence Against Women and their Children (VAW-C) ug uban pa ang atubangon sa maong basketbolista karong adlawa.

Ang suspek wala motubag sa mga pangutana sa mga tigbalita bahin sa mga gipasangil batok kaniya. /IBM (BANAT NEWS)