Carcar, Talisay ug Lapu-Lapu nanghawod sa Sinulog sa Kabataan sa Lalawigan 2020

CEBU, Philippines — Subling gipamatud-an sa Dakbayan sa Carcar nga usa sila sa mga contingents nga angayang atangan matag Sinulog kada tuig human nila gilangkat ang unang ganti sa Best in Ritual Showdown sa gipahigayong Sinulog sa Kabataan sa Lalawigan niadtong Sabado.

Ang Carcar City Division gisundan sa lain sab nga giatangang contingent ang gikan sa Dakbayan sa Talisay nga nakakuha sa ikaduhang luna ug sunod ang Lapu-Lapu City, Bogo City, Toledo City ug Ginatilan.

Sa Best in Musicality, ang Carcar, Talisay, Lapu-Lapu, Bogo, ug Toledo gihapon ang mananaog diin ang Carcar maoy nakakuha sa unang ganti.

Sa Best in Street Dancing, nakalabaw ang Talisay City nga maoy nakakuha sa unang ganti, sunod ang Carcar, ikatulo ang Lapu-Lapu City.

Ang choreographer sa Dakbayan sa Lapu-Lapu nga si March  Mandal nga nahinabi sa Banat News miangkon nga mubo ra kaayo ang panahon nga sila naka-praktis.

Matud niini, Disyembre na sila nakasugod pagpraktis og sayaw sa ilang 347 ka dancers ug propsmen uban sa pagsuporta sa ilang mga opisyales sa dakbayan.

Bisan sa kamubo sa panahon, nakahakot sila og tulo ka premyo gikan sa tulo ka kategoriya ug kining tanan nakuha nila sa ikatulong pwesto. /IBM (BANATNEWS)