Gullas ngadto sa kabataan: Ayaw padala sa emosyon
CEBU, Philippines — Dili maayong magpadala sa emosyon, mao kini ang mensahe ni Talisay City Mayor Gerald Anthony “Samsam” Gullas Jr. sa mga kabataan ug ipatigbabaw ang kabugnaw sa ulo aron dili malikay sila sa mga kasamok nga makaguba na hinuon sa ilang kaugmaon.
Ang pamahayag sa mayor may kalambigitan sa kamatayon sa 15 anyos nga tinun-an nga giingong gikulata sa iyang klasmeyt nga 18 anyos niadtong miaging semana.
Ang namatay mao si Nash Cañeda Empaces, 15 anyos nga taga Cabugnaan, San Isidro, Talisay City. Samtang ang suspek mao si Cegie Cristuta Galicia, 18 anyos nagpuyo sa Sitio Juana, Biasong, Talisay City.
Ang duha nagsungogay hangtud nga naghagitay nga magsinumbagay. Apan
atol sa ilang sinumbagay giingong gitangkugo ang biktima ug naigo sa kuto-kuto hinungdan sa pagkahagba niini sa yuta ug diha-diha naglisod og ginhawa.
Gidala sa tambalanan apan gideklarar nga dead on arrival. Nasubo si Gullas sa panghitabo tungod sa pagkamatay sa usa ingon man pagkapriso sa laing batan-on.
Matud sa mayor nga ang duha paglaom unta sa ilang tagsatagsa ka mga ginikanan apan tungod sa pagpadala sa ilang emosyon ug kapungot nawagtang ang maong maayong kaugmaon pinaagi lang sa binata nga sungogay.
Si Gullas kinsa maoy nahimong usa sa pinakabatang Kongresista niadtong 2013 hangtud 2019 ayha pa kini napiling mayor sa Dakbayan sa Talisay, mihangyo sa mga kabataan ug sa tanan nga likayan gyud nga maabot ang panagsungi sa pagsinakitay.
“Kung mahimo nga mag-estorya nalang ug isalikway ang bayolente nga panghunahuna,” matud pa ni Gullas. /IBM (BANATNEWS)
- Latest